​चुपके चुपके मालिकेत झळकणार तनाझ इराणी

चुपके चुपके या मालिकेत छोट्या पडद्यावरचे अनेक प्रसिद्ध कलाकार प्रेक्षकांना पाहायला मिळणार आहेत. या मालिकेत मोहित मल्होत्रा, पृथ्वी हाटे, कुणाल पंडित, फरीदा दादी, शाल्मली टोळ्ये यांसारखे छोट्या पडद्यावरचे अनेक कलाकार महत्त्वाच्या भूमिकेत आहेत. या कलाकारांच्या यादीत आणखी एका नावाची भर पडली आहे. या मालिकेत आता तनाझ करीम एका प्रमुख भूमिकेत झळकणार आहे. तनाझने गेल्या वीस वर्षांत अनेक मालिकांमध्ये महत्त्वाच्या भूमिका साकारल्या आहेत. काही महिन्यांपूर्वी ती बडे दूर से आये है या मालिकेत झळकली होती. या मालिकेतील तिच्या भूमिकेचे चांगलेच कौतुक झाले होते आणि आता तनाझ चुपके चुपकेमध्ये काम करणार आहे. या मालिकेत ती एका पारशी महिलेची भूमिका साकारणार आहे. या मालिकेत ती कुकू बाटलीवाला ही भूमिका साकारत असून कुकू अतिशय आनंदी, उत्साही, मजेशीर पण अनाकलनीय महिला आहे. ती या मालिकेत मोहित मल्होत्राच्या बॉसच्या भूमिकेत असून या भूमिकेविषयी तनाझ सांगते, "चुपके चुपके ही मालिका आतापर्यंतच्या सगळ्या मालिकांपेक्षा वेगळी असून या मालिकेत माझी स्वतःची आयटी फर्म असल्याचे दाखवण्यात आले आहे. मी काहीशी तिरसट असून त्याच्या लोकांना नक्कीच त्रास होतो. या भूमिकेसाठी निर्मात्यांनी काही अभिनेत्रींची ऑडिशन्सदेखील घेतली होती. त्यांना या भूमिकेसाठी तनाझ इराणीसारखी एखादी अभिनेत्रीच हवी होती. पण ऑडिशन घेतल्यानंतर कोणतीच अभिनेत्री त्यांना पटत नाही. त्यामुळे मलाच या भूमिकेसाठी विचारण्यात आले. पटकथा वाचल्यावर ही भूमिका केवळ माझ्यासाठी बनवण्यात आली असल्याची मला खात्री पटली आणि त्यात मी सध्या कोणतीही मालिका करत नसल्याने माझ्याकडे वेळ होता. त्यामुळे या मालिकेसाठी मी लगेचच होकार दिला. ही भूमिका प्रेक्षकांना आवडेल याची मला खात्री आहे."