‘सुख म्हणजे नक्की काय असतं’ (Sukh Mhanje Nakki Kay Asta) या मालिकेने अल्पावधीतच प्रेक्षकांच्या मनात घर केले आहे. या मालिकेतील सर्वच पात्रांना प्रेक्षकांची पसंती मिळते आहे. याच मालिकेतील देवकी अर्थात भूमिका साकारणारी मीनाक्षी राठोड (Meenakshi Rathod) कडे सध्या गुड न्यूज आहे. मीनाक्षी लवकरच आई होणार आहे. मीनाक्षी सध्या प्रेग्नेंसी एन्जॉय करते. प्रेग्नेंसीमध्येदेखील मीनाक्षी शूटिंग करते आहे. त्यामुळे सर्वत्र तिचे कौतुक होत आहे. तिच्या घरी नुकतेच नवीन सदस्याची एन्ट्री झाली आहे. आता हा सदस्य कोण असेल, हे जाणून घेण्यासाठी तुम्ही उत्सुक असाल ना. मिनाक्षीने नवीन कार विकत घेतली आहे. त्याचा फोटो इंस्टाग्रामवर शेअर केला आहे.
मीनाक्षी राठोड हिने नुकतेच इंस्टाग्रामवर कारसोबतचा फोटो शेअर करत लिहिले की, दोनाचे चार झाले. या फोटोत तिच्यासोबत तिचा नवरा कैलाश वाघमारेदेखील आहे. तिच्या या फोटोवर शुभेच्छांचा वर्षाव होतो आहे.
मीनाक्षीचा नवरा कैलाश हादेखील एक उत्तम अभिनेता आहे. दोघांनी कॉलेजमध्ये असतानाच अभिनय प्रवासाला सुरूवात केली होती. मीनाक्षी ही मुळची जालन्याची असून तिथल्याच गंगाराम वाडी, अंबड येथील शाळेतून तिने शिक्षण घेतले. करिअर करण्यासाठी ती मुंबईत आली. थिएटर आर्ट्स, मुंबई विद्यापीठ येथून तिने पुढील शिक्षण घेतले. २०१८ मध्ये मराठी मालिका ‘बाळूमामाच्या नावानं चांगभलं’ मधून मीनाक्षीने टीव्ही विश्वात पदार्पण केलं. २०२० मध्ये तिला ‘सुख म्हणजे नक्की काय असतं’ ही मालिका मिळाली. मीनाक्षीने अनेक लघुपटांमध्ये काम केलंय. तिचा ‘खिसा’ लघुपट गाजला. या लघुपटाला राष्ट्रीय पुरस्कारही मिळाला आहे. मयत, कमरबंद, सायकल यासारख्या चित्रपटांमध्ये तिने अभिनय केला आहे.