झी मराठीवरील अप्पी आमची कलेक्टर (Appi Aamchi Collector) या मालिकेतील अप्पी प्रेक्षकांच्या विशेष पसंतीस उतरली आहे. अतिशय खडतर प्रवास करत मेहनतीने आणि जिद्दीने अप्पीने स्पर्धा परीक्षेत उत्तीर्ण होऊन गावाचे नाव उंचावर नेऊन ठेवले आहे. तिच्या कलेक्टर होण्यामुळे सगळ्या गावाला तिचा अभिमान वाटत आहे. मात्र तरीही अप्पीने कलेक्टर होण्याऐवजी चूल आणि मूल यातच अडकून राहावे अशी तिच्या सासरच्या मंडळींची भूमिका आहे. पण सासऱ्यांच्या आणि अर्जुनच्या भक्कम पाठिंब्याने ती आता कलेक्टर पदाचे ट्रेनिंग घेत आहे. त्यासाठी मालिकेत नवनवीन पात्रांची एन्ट्री करण्यात आली आहे.
अप्पीला ट्रेनिंग देणारी मॅडम सर या मालिकेत दाखल झालेली पाहायला मिळत आहे. ट्रेनिंगच्या पहिल्याच दिवशी अप्पीला यायला उशीर होतो हे पाहून या मॅडम तिच्यावर भडकलेल्या आहेत. मात्र आपल्याला उशीर का झाला याचे कारण सांगून अप्पीने या मॅडमचे मन जिंकलेले पाहायला मिळत आहे. आज या मॅडम सरची भूमिका साकारणाऱ्या अभिनेत्रीबद्दल काही खास गोष्टी जाणून घेऊयात…
अप्पी आमची कलेक्टर या मालिकेत आलेल्या ट्रेनरची भूमिका अभिनेत्री नीलम पांचाळ हिने साकारलेली आहे. नीलम पांचाळ ही गुजराथी अभिनेत्री आहे. हेल्लारो या गुजराथी चित्रपटातील प्रमुख भूमिकेसाठी तिला राष्ट्रीय पुरस्काराने गौरविण्यात आले होते. निलमने हिंदी मालिकांमधूनही आपल्या अभिनयाची झलक दाखवून दिली आहे. गेली अनेक वर्षे हिंदी मालिकेतून काम करणाऱ्या निलमने हमारी देवराणी, रुक जाना नहीं, एक वीर की आरदास… विरा, लाजवंती, इशकबाज अशा हिंदी मालिका तीने गाजवलेल्या आहेत. याशिवाय निलमने बॉलिवूड चित्रपटातही महत्वपूर्ण भूमिका साकारलेल्या आहेत. काबिल, वश हे तिने अभिनित केलेले हिंदी , गुजराथी चित्रपट आहेत. वैजू नं १ या मालिकेतून निलमने मराठी सृष्टीत पदार्पण केले होते. या मालिकेत ती रिअल लाईफ पार्टनर म्हणजेच अभिनेता मिहीर राजदा सोबत गुजराथी जोडप्याची भूमिका साकारताना दिसले. मिहीर आणि नीलम पांचाळ दोघेही रिअल लाईफ नवरा बायको आहेत. या दोघांनी हिंदी मालिकेतून एकत्रित काम केले होते. इथेच त्यांचे प्रेम जुळून आले असे म्हटले जाते.
श्रीकृष्णा या हिंदी मालिकेतून मिहीर बालकलाकाराच्या भूमिकेत झळकला होता. बालपणापासूनच अभिनय क्षेत्रात कार्यरत असलेल्या मिहिरने पुढे जाऊन मराठी मालिका सृष्टीत स्वतःची ओळख बनवली. माझ्या नवऱ्याची बायको या मालिकेत त्याने आनंदची भूमिका गाजवली होती. यानंतर मिहीर अजूनही बरसात आहे मालिकेतून झळकला. आभिनयाच्या जोडीला मिहिरने दिग्दर्शन आणि लेखन क्षेत्रातही आपला जम बसवलेला आहे. गेल्या काही वर्षांपासून तो मालिकांचे लेखन, संवाद लेखनाचे काम तो करतो आहे. बाई दार उघड या झी मराठीवरील मालिकेसाठी तो हे काम करत आहे. अप्पी आमची कलेक्टर ही निलमची दुसरी मराठी मालिका आहे. या मालिकेत ती एका दमदार भूमिकेत दिसत आहे.