प्रेक्षकांना खळखळून हसायला लावणाऱ्या द कपिल शर्मा शो(The Kapil Sharma Show) या कार्यक्रमाने नुकताच प्रेक्षकांचा निरोप घेतला आहे. कलर्स चॅनेलवरुन हा शो ऑफ एअर झाला आहे. ज्यामुळे सध्या प्रेक्षकांमध्ये एक प्रकारचा नाराजीचा सूर आहे. तर, दुसरीकडे या कार्यक्रमाची आणि त्यातील कलाकारांची चर्चा रंगली आहे. सध्या कपिल शर्माची संपूर्ण टीम सुट्टी एन्जॉय करण्यासाठी विदेशात गेली आहे. त्यामुळे सोशल मीडियावर त्यांचे फोटो व्हायरल होत आहेत. यामध्येच या पर्वासाठी कपिलने घेतलेल्या मानधनाचीही चर्चा होताना दिसते.
'द कपिल शर्मा'च्या तिसऱ्या पर्वासाठी कपिलने घेतलेलं मानधन सध्या चर्चेत आलं आहे. विशेष म्हणजे कपिलने एखाद्या चित्रपटाला घ्यावं इतकं मानधन घेतल्याचं सांगण्यात येत. या तिसऱ्या पर्वासाठी कपिलने त्याच्या मानधनाचा आकडा वाढवला होता. त्यामुळेच त्याचं एका भागाचं मानधन किती होतं ते पाहुयात.
कपिल शर्माने (Kapil Sharma) या शोच्या प्रत्येक भागासाठी ५० लाख रुपये चार्ज केल्याचं सांगण्यात येतं. siasat.com च्या माहितीनुसार, एका भागासाठी ५० लाख रुपये फी घेणाऱ्या कपिलने या सीझनसाठी ४० कोटी रुपये मानधन घेतलं होतं. या भागात एकूण ८० एपिसोड होते.
दरम्यान, कपिल शर्माने घेतलेल्या या फी मुळे भलेभले थक्क झाले आहेत. इतकं मानधन कलाकार मंडळी चित्रपटांसाठी आकारतात. मात्र, कपिलने ही रक्कम एका कार्यक्रमासाठी घेत छोट्या पडद्यावरील महागडा कलाकार ठरला आहे.