​या मालिकेचे कलाकार करतायेत ऑस्ट्रेलियात मजामस्ती

देख भाई देख या नव्वदीत प्रक्षेपित झालेल्या मालिकेचे परदेशात चित्रीकरण करण्यात आले होते. त्यानंतर क्योंकी साँस भी कभी बहू थी या मालिकेचे चित्रीकरण ऑस्ट्रेलियात झाले. 10-20 वर्षांपूर्वी मालिकांचे चित्रीकरण परदेशात होणे हे नवलाचे मानले जात होेते. पण आता मालिकांचे चित्रीकरण परदेशात होणे नवीन राहिलेले नाही. सध्या अनेक मालिकांचे परदेशात चित्रीकरण होते. नुकतेच परदेस में है मेरा दिल या मालिकेचे चित्रीकरण ऑस्ट्रीयामध्ये करण्यात आले आणि आता ये है मोहोब्बते या मालिकेची संपूर्ण टीम ऑस्ट्रेलियाला रवाना झाली आहे. या मालिकेतील काही महत्त्वाच्या भागांचे तिथे चित्रीकरण करण्यात येणार आहे. एकता कपूर या मालिकेची निर्माती आहे. ही मालिका तिच्यासाठी खूप खास असल्याचे तिचे नेहमीच म्हणणे असते. त्यामुळे या मालिकेच्या प्रत्येक गोष्टीत ती जातीने लक्ष देते. ऑस्ट्रेलियात कलाकारांनी काही कमी पडू नये यासाठी ती जातीने लक्ष देत आहे.ये है मोहोब्बते या मालिकेत रमण शगुनच्या शोधात ऑस्ट्रेलियाला गेल्याचे प्रेक्षकांना पाहायला मिळणार आहे. तसेच ही मालिका लवकरच लीप घेणार आहे. लीपनंतरदेखील या मालिकेतील कलाकार ऑस्ट्रेलियातच दिसणार आहेत. दिव्यांका त्रिपाठी, करण पटेल, अनिता हंसनंदानी, रुहानिका धवन, आदिती भाटिया हे सगळेच कलाकार ऑस्ट्रेलियाला चित्रीकरणासाठी रवाना झाले आहेत. तिथे चित्रीकरण करण्याचा अनुभव खूपच चांगला असल्याचे या सगळ्यांचे म्हणणे आहे. आपल्या फॅन्सना आपली मजामस्ती पाहाता यावी यासाठी दिव्यांका, करण आणि अनिता तिघेही सोशल नेटवर्किंग साईटवर ऑस्ट्रेलियाचे फोटो पोस्ट करत आहेत.