मुंबई - टायगर श्रॉफ आणि क्रिती सनॉन यांच्या बिग बजेट 'गणपत' चित्रपट आज प्रदर्शित होत आहे. तत्पूर्वी या चित्रपटाचे स्पेशल स्क्रिनिंग आयोजित करण्यात आले होते, ज्यामध्ये बॉलिवूडचे सर्व स्टार्स उपस्थित होते. या सगळ्यामध्ये काजोल तिचा मुलगा युगसोबत कॅमेरासमोर पोझ देताना दिसली. गणपतच्या स्क्रीनिंगसाठी काजोल, जॅकी श्रॉफ, रकुल प्रीत सिंग, अनिल कपूर असे अनेक स्टार्स उपस्थित होते. आज प्रदर्शित होत असलेल्या या सिनेमाला साऊथ स्टार थलैवा रजनीकांतनेही ट्विट करुन शुभेच्छा दिल्या आहेत. त्यास, टायगरने लगेचच लॉट्स ऑफ लव्ह असा रिप्लाय दिला.
टायगर श्रॉफचा 'गणपत' हा २०२३ सालातील मोस्ट अवेटेड चित्रपटांपैकी एक आहे आणि तो आज २० ऑक्टोबर रोजी चित्रपटगृहांमध्ये प्रदर्शित होत आहे. बॉक्स ऑफिसवर, थलपती विजयचा 'लिओ' देखील या आठवड्यात रिलीज झाला आहे, ज्याने सुमारे ७४ कोटींची जबरदस्त ओपनिंग केली आहे. त्यामुळे, टायगरच्या गणपतकडे बॉलिवूडच्या नजरा लागल्या आहेत. गणपतला चाहत्यांचा कसा प्रतिसाद मिळतो, ते या आठवड्यात दिसून येईल. गणपत हा बिग बजेट एक्शन थ्रीलर चित्रपट असून टायगर श्रॉफ आणि क्रिती सनॉन यांची प्रमुख भूमिका आहे. त्यासाठी, दोघांनाही शुभेच्छा देण्यात येत आहेत. थलैवा रजनीकांतनेही ट्विट करुन टायगर श्रॉफसह संपूर्ण टीमला शुभेच्छा दिल्या आहेत.
टायगर श्रॉफ आणि #गणपत चित्रपटाच्या संपूर्ण कलाकार आणि क्रू यांना माझ्या हार्दिक शुभेच्छा. चित्रपटाच्या यशासाठी तुम्हाला सर्वांना शुभेच्छा, असे ट्विट रजनीकांतने केलंय. रजनीच्या या ट्विटला टायगरने लगेचंच रिप्लाय दिला आहे. सर, आपणाबद्दल मोठा आदर आदर आणि खूप प्रेम. आपल्या दिलखुलास शुभेच्छांसाठी खूप खूप धन्यवाद, ह्या शुभेच्छा आमच्यासाठी खास आहेत, विशेषत: माझ्यासाठी वर्ल्डक्लास आहेत. पुन्हा एकदा खूप खूप धन्यवाद आणि प्रेम, असा रिप्लाय टायगर श्रॉफने केला आहे.
अॅक्शनपट, बिग बींचीही महत्त्वाची भूमिका पूजा एंटरटेनमेंटच्या बॅनरखाली तयार होत असलेल्या गणपत चित्रपटात टायगर श्रॉफसोबतक्रिती सनॉन आणि अमिताभ बच्चन मुख्य भूमिकेत आहेत. गणपत या चित्रपटातील व्यक्तिरेखा साकारण्याचा अनुभव वेगळा असल्याचे टायगर श्रॉफने सांगितले. तो म्हणाला, हे खूप वेगळे आहे, याआधी इतक्या छटा असलेले पात्र मी कधीच साकारले नव्हते. मी नेहमीच साधा नायक होतो, याला एक काळी बाजू आहे आणि ती खूपच लहान मुलांसारखी आहे. या चित्रपटात क्रिती सनॉनही अॅक्शन करताना दिसणार आहे.