अभिनेत्री कंगना रणौत प्रेक्षकांच्या भेटीला येणार आहेत. 'चंद्रमुखी २’ या चित्रपटाचा थरारक ट्रेलर प्रदर्शित झाला आहे. हा चित्रपट हा दाक्षिणात्त्य चित्रपट 'चंद्रमुखी'चा दुसरा भाग आहे. या चित्रपटात आपल्याला कंगना रणौत तिच्या नृत्य अदांनी सगळ्यांना घायाळ करताना पाहायला मिळणार आहे.
चंद्रमुखी २ मध्ये कंगना मुख्य भूमिकेत असून तिच्यासोबत राघव लॉरेन्स दिसणार आहे. कंगनानं एका नर्तिकेची तर राघव लॉरेन्सनं राजा वेट्टीयान राजाची भूमिका साकारली आहे. ट्रेलरची सुरुवात एका कुटुंबापासून होते. जे एका हवेलीत राहायला येतात. मग तिथे त्याची गाठ चंद्रमुखीच्या आत्म्याशी होते. चित्रपटाची संपूर्ण कथा ही चंद्रमुखीभोवती फिरते. हॉरर, सस्पेन्सने परिपुर्ण असलेल्या या ट्रेलरला प्रेक्षकांचा तुफान प्रतिसाद मिळाला आहे.
चंद्रमुखी २ हा येत्या १५ सप्टेंबर रोजी प्रदर्शित होणार असून तो पॅन इंडिया प्रोजेक्ट आहे. तो तमिळ, तेलुगू, हिंदी, मल्याळम आणि कन्नड भाषेमध्ये प्रदर्शित होणार असल्याची माहिती मेकर्सनं दिली आहे. यापूर्वी २००५ मध्ये आलेल्या ब्लॉकबस्टर चंद्रमुखीमध्ये रजनीकांत आणि ज्योतिका यांनी प्रमुख भूमिका साकारल्या होत्या. चंद्रमुखीच्या पहिला भागाला प्रेक्षकांनी तूफान प्रतिसाद दिला होता. आता चंद्रमुखी २ पाहण्यासाठी प्रेक्षकांची आतुरता शिगेला पोहचली आहे.
कंगनाच्या वर्कफ्रंटबद्दल बोलायचे झाले तर अभिनेत्रीचा ‘इमर्जन्सी’ हा चित्रपट नोव्हेंबरमध्ये प्रदर्शित होणार असून गेल्या अनेक दिवसांपासून चाहत्यांना तिच्या आगामी चित्रपटाची उत्सुकता लागली आहे. बहुचर्चित ‘इमर्जन्सी’मध्ये कंगनाने इंदिरा गांधींची भूमिका साकारली आहे. या चित्रपटात कंगनासोबत अनेक दिग्गज सेलिब्रिटींची फौज दिसणार आहे.