छोट्या पडद्यावर गाजत असलेली मालिका म्हणजे 'आई कुठे काय करते' (aai kuthe kay karte). या मालिकेत आतापर्यंत अनेक रंजकदार वळणं आल्याचं सगळ्यांनी पाहिलं आहे. याच रंजकदार वळणांमुळे ही मालिका दिवसेंदिवस लोकप्रिय होत आहे.सतत नवऱ्याच्या दबावाखाली राहणारी अरुंधती घटस्फोटानंतर मुक्तपणे वावरु लागली आहे. इतकंच नाही तर आता ती स्वत:साठी खंबीरपणे उभी राहू लागली आहे. काही दिवसांपूर्वीच अरुंधतीने देशमुखांचं घर सोडलं. परंतु, हे घर सोडण्यामागेही काही कारणं होतं. विशेष म्हणजे आता या मालिकेत आणखी एक मोठा ट्विस्ट येणार आहे. आशुतोष देशमुखांच्या सगळ्या घरातल्यांसमोर अरुंधतीवर असलेल्या प्रेमाची कबुली देणार आहे.
स्टार प्रवाहने त्यांच्या अधिकृत इन्स्टाग्राम पेजवर एक प्रोमो शेअर केला आहे. या प्रोमोमध्ये आशुतोष अरुंधतीवर असलेल्या प्रेमाची कबुली देतो. इतकंच नाही तर अरुंधती हे सगळं काही चोरून ऐकत असते. त्यामुळे तिलाही कमालीचा धक्का बसणार आहे.
व्हायरल होत असलेल्या व्हिडीओमध्ये अनिरुद्ध, अरुंधतीच्या चारित्र्यावर शिंतोडे उडवत असतो. इतकंच नाही तर अरुंधती आणि आशुतोष यांच्यात प्रेमसंबंध असल्याचा गलिच्छ आरोपही तो करतो. या आरोपानंतर आशुतोष संतापून उठतो आणि त्याचं अरुंधतीवर एकतर्फी प्रेम असल्याचं मान्य करतो.
आई कुठे काय करते: अनिरुद्धचा बदलणार लूक? मिलिंद गवळींचं नवं फोटोशूट चर्चेत
"अरुंधतीने फक्त आणि फक्त आयुष्यभर तुझ्यावर प्रेम केलं. आणि, हो माझं विचारशील तर आहे माझं अरुंधतीवर प्रेम. पण, हे फक्त माझ्या मनात आहे", असं जाहीरपणे आशुतोष देशमुख कुटुंबाला आणि अनिरुद्धला सांगतो. मात्र, आशुतोषने केलेल्या या खुलाशामुळे नेमकं काय होणार? अरुंधती आणि त्याच्या मैत्रीत दुरावा येणार का? काय असेल अरुंधतीची? प्रतिक्रिया असे कितीतरी प्रश्न अनुत्तरीत आहेत. मात्र, याची उत्तरं प्रेक्षकांना मालिकेतूनच मिळणार आहेत.