कोरोना व्हायरसने जगभरात थैमान घातले असून आता भारतातही कोरोना व्हायरस पसरायला सुरुवात झाली आहे. खबरदारी म्हणून शाळा-कॉलेज बंद केले जात आहेत. तसेच सिनेमांचे शूटिंग आणि प्रमोशनही काही काळ थांबवण्यात आले आहेत. एवढेच नव्हे तर भारतातील अनेक राज्यात मॉल्स, थिएटर बंद करण्यात आले आहेत. ऑफिसेसमध्ये देखील अनेक ठिकाणी वर्क फ्रॉम होम देण्यात आले आहे. लोकांनी घरातून कमीत कमी बाहेर पडावे. गरज असेल तरच सार्वजनिक वाहतुकीचा पर्याय वापरावा असे सरकार गेल्या काही दिवसांपासून मीडियाच्या माध्यमातून लोकांना सांगत आहे.
बॉलिवूडमधील अनेक सेलिब्रिटी सध्या कोरोनामुळे घरातच आहेत. लोकांनी देखील घराच्या बाहेर पडू नयेत यासाठी ते आवाहन करताना दिसत आहेत. सध्या प्रत्येकाने निरोगी राहाणे गरजेचे असून शरीराची इम्यून सिस्टिम देखील वाढवणे गरजेचे आहे.
कोरोना व्हायरसचा फैलाव टाळण्यासाठी शहरातील सगळ्या जीम तात्पुरत्या बंद झाल्या असून कॅटरिना कैफ, मलायका अरोरा, जॅकलिन फर्नांडिज, उर्वशी रौतेला यांसारख्या फिटनेस फ्रीक अभिनेत्री घरातच व्यायाम करताना दिसत आहेत. एवढेच नव्हे तर आपल्या चाहत्यांनाही देखील घरात राहून व्यायाम कसा करावा हे त्यांच्या सोशल मीडियाच्या अकाऊंटवरून शिकवण्यास सुरुवात देखील केली आहे. अभिनेत्री उर्वशी रौतेलाने इन्स्टाग्रामवर व्हिडिओ पोस्ट करत कसरत आणि स्ट्रेचिंग घरबसल्या कसे करायचे हे सांगितले आहे. हा व्हिडिओ चांगलाच व्हायरल झाला असून पहिल्याच दिवशी २० लाखांहून अधिक लोकांनी हा व्हिडिओ पाहिला आहे.
योग आणि व्यायाम करण्यासाठी आपण खुर्ची, सोफाचा आधार घेऊन शकतो. घरात बसल्या बसल्या स्क्वाट्स, पुशअप्स, ट्रायसेप डिप्स इत्यादी व्यायाम करू शकतो असे ती या व्हिडिओत ती सांगताना दिसत आहे. तसेच आपली इम्यून सिस्टिम चांगली ठेवण्यासाठी फळे, पालेभाज्या आणि ज्यूस पिऊन स्वतःला तंदरुस्त ठेवावे असा देखील सल्ला ती तिच्या चाहत्यांना देत आहे.