वैभवला डिरेक्ट करणार अवधुत

बाजीराव मस्तानी या चित्रपटातील ‘चिमाजी अप्पा’ साकारणारा वैभव तत्त्ववादी या सिनेमानंतर एकदमच प्रकाशझोतात आला. मालिका आणि चित्रपटातील दमदार अभिनयामुळे वैभवने प्रेक्षकांच्या मनात जागा निर्माण केली आहे. मिस्टर अ‍ॅण्ड मिसेस सदाचारी, कॉफी आणि बरंच काही, चीटर या सिनेमांमध्ये वैभवची प्रमुख भूमिका होती. आता हा हॅण्डसम हंक काय करतोय याकडेच त्याच्या चाहत्यांचे लक्ष लागले होते. वैभवच्या चाहत्यांसाठी आम्ही एक सुखद बातमी घेऊन आलो आहे. अवधुत गुप्ते यांच्या आगामी चित्रपटात वैभव आपल्याला एका विशेष भूमिकेत पाहायला मिळणार आहे. या चित्रपटाविषयी वैभवने सीएनएक्सला दिलेल्या मुलाखतीत अनेक गोष्टींचा उलगडा केला. अवधुत गुप्ते यांच्यासोबतचा माझा हा पहिलाच चित्रपट लवकरच येत आहे. या चित्रपटाचे दिग्दर्शन अवधुत गुप्ते यांनी केले आहे. एका वेगळ्या विषयावर या सिनेमात प्रकाश टाकण्यात आला आहे. प्रताप सरनाईक या सिनेमाची निर्मिती करणार आहेत. या चित्रपटाचे चित्रीकरण पूर्ण झाले असून आम्ही लवकरच एका कार्यक्रमाद्वारे या सिनेमाचे कलाकार व प्रदर्शनाची तारीख घोषित करणार आहोत. तर चित्रपटाची प्रसिद्धी तुम्ही उशिरा का करीत आहात, असे वैभवला विचारल्यावर तो म्हणाला, ‘हा चित्रपटच वेगळा आहे. प्रमोशनला जरी उशिरा सुरुवात केली तरी तो सर्वांपर्यंत नक्कीच पोहोचणार आहे. आम्ही वेगळ्या प्रकारची प्रमोशन पद्धत यासाठी वापरणार असल्याचे त्याने सांगितले. झेंडा, मोरया, एक तारा यांसारखे चित्रपट केल्यानंतर आता अवधुत गुप्ते कोणत्या स्वरूपाची कथा प्रेक्षकांसमोर घेऊन येणार आहेत याची उत्सुकता लागली आहे.