बॉलिवूडचा बादशहा असलेल्या शाहरुख खानला कोण ओळखत नाही. लहान मुलांपासून ते मोठ्यांपर्यंत सगळेच त्याचे फॅन आहेत. दमदार अभिनय आणि अपार मेहनतीच्या जोरावर बॉलिवूडमध्ये नाव कमावणाऱ्या किंग खानच्या चाहत्या वर्गात दिवसेंदिवस भर पडत आहे. त्याच्या स्टाइलचे लाखो दिवाने आहेत. केवळ अभिनय आणि स्टाइलमुळेच नव्हे तर शाहरुख त्याच्या बॉलिवूडमधील सक्सेससाठी ओळखला जातो. कोणताही गॉडफादर नसताना बॉलिवूडमध्ये पाय ठेवलेला शाहरुख आज मनोरंजनविश्वावर राज्य करतो.
चाहत्यांच्या मनावर राज्य करणाऱ्या आणि हटके स्टाइलने सगळ्यांना भुरळ घालणाऱ्या प्रेक्षकांच्या लाडक्या शाहरुखचा आज वाढदिवस आहे. किंग खानला शुभेच्छा देण्यासाठी चाहते दरवर्षी त्याच्या मन्नतबाहेर गर्दी करतात. आज त्याच्या वाढदिवसानिमित्त सोशल मीडियावर शुभेच्छांचा महापूर आला आहे. अनेक सेलिब्रिटींनीही किंग खानला वाढदिवसानिमित्त खास शुभेच्छा दिल्या आहेत. भारताचा माजी क्रिकेटर वीरेंद्र सेहवागनेही शाहरुखसाठी खास पोस्ट शेअर केली आहे. सेहवागने शाहरुखबरोबरचे काही unseen फोटो त्याच्या इन्स्टाग्राम अकाऊंटवरुन शेअर केले आहेत. या फोटोला त्याने दिलेल्या कॅप्शनने सगळ्यांचं लक्ष वेधून घेतलं आहे.
"हॅपी बर्थडे किंग. बाप बाप होता है. तू तुझ्या सर्वोत्तम देत राहशील. निरोगी आणि आनंदी राहा", असं सेहवागने पोस्टमध्ये म्हटलं आहे. त्याच्या या पोस्टवर चाहत्यांनी कमेंटही केल्या आहेत. दरम्यान, किंग खानने त्याच्या वाढदिवसानिमित्त चाहत्यांना खास सरप्राइज दिलं आहे. शाहरुखच्या आगामी 'डंकी' सिनेमाचा टिझर आज प्रदर्शित करण्यात आला आहे.