या खेळाडूंसोबत काय करतोय भूषण?

भूषण प्रधानचा नवा चित्रपट प्रेक्षकांच्या भेटीस येणार असल्याचे त्यानेच सोशल मीडियाद्वारे त्याच्या फॅन्सना सांगितले आहे. भूषण त्याच्या नव्या चित्रपटातील भूमिकेची सध्या जोरदार तयारी करत आहे. भूषण गेल्या कित्येक दिवसांपासून या चित्रपटासाठी काही खेळाडूंसोबत चित्रीकरण करत आहे. भूषणने त्याच्या आगामी चित्रपटाचे चित्रीकरण बालेवाडी स्टेडियममध्ये केले आहे, हे त्याच्या इन्स्टाग्रामच्या अकाऊंटवरून कळत आहे. त्याने इन्स्टाग्राम या सोशल नेटवर्किंग साइटवर एक फोटो पोस्ट केला आहे. त्या फोटोत त्याच्यासोबत आणखी तीन मुले आपल्याला पाहायला मिळत आहे. या फोटोसोबत त्याने एक कॅप्शनदेखील लिहिली आहे. त्याने या कॅप्शनमध्ये म्हटले आहे की, ‘माझ्या चित्रपटाचे नुकतेच पॅकअप झाले आहे. राष्ट्रीय स्तरावरचा अ‍ॅथलीट आणि दोन राष्ट्रीय पुरस्कार विजेते यासारख्या अतिशय चांगल्या टीमसोबत काम करण्याचा अनुभव खूपच चांगला होता. तुमच्यासाठी मी काहीतरी नवीन घेऊन येत आहे.’ या चित्रपटाबाबत भूषण सांगतो, ‘हा चित्रपट एका खेळाशी निगडित आहे. चित्रपट खेळाशी निगडित असल्याने अनेक वेगवेगळ्या गोष्टी तुम्हाला यात पाहाता येणार आहेत. या चित्रपटात माझी भूमिका फारच वेगळी आहे. या चित्रपटात माझ्यासोबत हंसराज जगताप आणि विवेक चाबुकस्वार हे दोन बालकलाकारही आहेत. या चित्रपटाचे दिग्दर्शन अभिनेते मिलिंद शिंदे यांनी केले आहे.’