ऑनलाइन लोकमत
मुंबई, दि. १४ - बॉलिवूड अभिनेता संजय दत्त पुन्हा 'खलनायक' चित्रपटाच्या सिक्वेलमध्ये झळकणार असल्याचे समजते. बॉलिवूडलाईफ डॉट कॉमने दिलेल्या वृत्तानुसार, ९० च्या दशकात सर्वाधिक हिट झालेल्या 'खलनायक' या चित्रपटाचा सिक्वेल दिग्दर्शक सुभाष घई बनविण्याच्या तयारीत आहेत. या सिक्वेलसाठी पुन्हा संजय दत्तलाच 'खलनायक' बनण्याची संधी मिळणार असल्याची शक्यता बॉलिवूड जगतात वर्तविण्यात येत आहे.
'खलनायक' चित्रपटात संजय दत्तने प्रमुख भूमिका साकारली होती. हा चित्रपट त्यावेळी सुपरहिट झाला होता, तसेच यातील गाणीही गाजली होती. संजय दत्तसोबतच अभिनेत्री माधुरी दीक्षित आणि जॅकी श्रॉफ यांनीही भूमिका साकारल्या होत्या.
आता पुन्हा 'खलनायक'च्या सिक्वेलमध्ये संजय दत्त याच्यासोबतच पुन्हा अभिनेत्री माधुरी दीक्षित दिसणार की आणखी कोणत्या अभिनेत्रीली संधी देण्यात येणार याबाबतही चर्चा सुरु आहेत.
संजय दत्तला अनेक चित्रपटांमध्ये काम करण्याच्या ऑफर येत आहेत. मात्र सध्या मुंबई बॉम्बस्फोट प्रकरणी संजय दत्त येरवडा तुरुंगात शिक्षा भोगत असल्यामुळे त्याला अजून एक वर्ष तरी तुरुंगातून बाहेर पडता येणार नाही.