छोट्या पडद्यावरचे अनेक शो व मालिकांनी प्रेक्षकांना वेड लावलं आहे. आता झी मराठीवरचा (Zee Marathi) एक असाच लोकप्रिय शो लवकरच प्रेक्षकांचा निरोप घेणार आहे आणि त्या जागी एक नवा कोरा शो तुमच्या मनोरंजनासाठी येणार आहे. होय, झी मराठी वाहिनीवरचा ‘किचन कल्लाकार’ (Kichen Kallakar ) हा शो प्रेक्षकांचा आवडता शो बंद होणार असल्याची चर्चा सुरू झाली आहे. या शोमध्ये अनेक मराठी दिग्गज कलाकार आणि राजकारणी येऊन त्यांची पाककला दाखवतात. यावेळच्या गमतीजमती प्रेक्षकांना खिळवून ठेवतात.
गेल्या काही दिवसांपासून ‘किचन कल्लाकार’ या शोमध्ये बरेच बदल झालेले पाहायला मिळाले. शोमध्ये महाराज या भूमिकेत असलेले अभिनेते प्रशांत दामले यांची जागा निर्मिती सावंत यांनी घेतली आहे. तर शोचा होस्ट संकर्षण कऱ्हाडे अन्य प्रोजेक्टमध्ये बिझी असल्यानं त्याच्या जागी श्रेया बुगडे दिसते आहे. संकर्षण हा ‘तू म्हणशील तसं’ या नाटकाच्या दौऱ्यासाठी लंडनला गेला आहे. प्रशांत दामले हे देखील ‘सारखं काहीतरी होतंय’ या नाटकासाठी लंडन दौऱ्यावर आहेत. अशात आता ‘किचन कल्लाकार’ चा शो लवकरच प्रेक्षकांचा निरोप घेण्याची शक्यता वर्तवली जात आहे.
आता येणार हा नवा शोचर्चा खरी मानाल तर ‘किचन कल्लाकार’च्या जागी ‘डान्स महाराष्ट्र डान्स’ (Dance Maharashtra Dance ) हा नवा रिअ‍ॅलिटी शो सुरू होणार आहे. या शोमध्ये महाराष्ट्रातील बालकलाकार थिरकताना दिसणार आहेत. ऑडिशनद्वारे लिटिल मास्टर्सची निवड करण्यात येणार आहे. लवकरच ऑडिशन सुरू होणार आहेत. या नवीन शोमध्ये कोण होस्ट असणार आणि जजेसच्या खुर्चीवर कोण दिसणार? हे अद्याप गुलदस्त्यात आहे. लवकरच त्याचाही खुलासा होईलच.