जावई सासूरवाडीत राहण्यस सासऱ्याचा विरोध; जावयाच्या मारहाणीत सासऱ्याचा मृत्यू

काशीराम म्हाबरे / म्हापसा: सासूरवाडीत आपल्या कुटुंबासहित राहणाऱ्या जावयाने राहण्यावरून विरोध करणाऱ्या सासऱ्याची हत्या केल्याची घटना समोर आली आहे. थिवी येथे हा प्रकार घडला आहे. डेनिस पॉल डायस (६४) असे मृत व्यक्तीचे नाव आहे. कोलवाळ पोलीस स्थानकाचे निरीक्षक सोमनाथ माजीक यांनी दिलेल्या माहितीनुसार घटना शनिवार ३ जून रोजी रात्री ९. ४५ च्या दरम्यान घडली. डेनिस पॉल डायसचा जावई जोनीतान डिसोझा (३९) याने सासऱ्याला लाथा बुक्क्यांनी मारहाण केली, यातच त्यांचा मृत्यू झाला.  

आपल्या सासूरवाडी कुटुंबासहित राहणाऱ्या जोनीतान डिसोझाच्या तेथील वास्तव्यास सासऱ्याकडून विरोध होत होता. यामुळे त्यांच्यात सततचे खटके उडायचे. या दरम्यान जावयाने सासऱ्याला मारण्याची अनेकवेळा धमकीसुद्धा दिली होती. अखेर ३ रोजी त्याने दिलेल्या सासऱ्याचा जीव घेतला. सासऱ्याला संवेदनशील जागीसुद्धा मारहाण केल्याने त्यातच त्यांचा मृत्यू झाल्याचा कयास पोलिसांनी व्यक्त केला आहे. रविवार जावयाला अटक करण्यात आली. त्याला न्यायालया समोर हजर केले असता न्यायालयाने ४ दिवसांचा पोलीस रिमांड दिला आहे. पुढील तपास उपनिरीक्षक कुणाल नाईक करत आहेत.