आमगाव तालुक्यात ग्रा. पं. निवडणुकीचा संमिश्र निकाल

आमगाव : तालुक्यातील २२ ग्रामपंचायतींच्या १८२ जागांसाठी झालेल्या निवडणुकीत भाजपचे सर्वाधिक ६८ उमेदवार विजयी झाल्याचा दावा भाजपने केला आहे.

तालुक्यातील रामाटोला ग्रामपंचायत बिनविरोध झाली तसेच गोसाईटोला ग्रामपंचायत निवडणुकीत ७ पैकी ६ सदस्य बिनविरोध निवडून आले असून, एका सदस्य पदासाठी निवडणूक घेण्यात आली. भाजपने सर्वाधिक ६८ उमेदवार तर काँग्रेसने ६५, राष्ट्रवादीने ३५, शिवसेनेनेही उमेदवार निवडून आल्याचा दावा केला आहे. तालुक्यातील रामाटोला व गोसाईटोला ग्रामपंचायती बिनविरोध झाल्या आहेत. येथील तहसील कार्यालयात सोमवारी सकाळी १० वाजता मतमोजणी सुरु करण्यात आली. निवडणूक निर्णय अधिकारी डी. एस. भोयर यांनी निकाल जाहीर केले. यावेळी महारीटोला व सरकाटोला या ग्रामपंचायतींची मतमोजणी पुन्हा करण्यात आली. मात्र, निकालात काहीही बदल झाला नाही. निवडणुकीचे निकाल जाहीर होताच विजयी उमेदवारांनी जल्लोष केला.