प्रियकरासोबत पळून गेलेल्या प्रेयसीला दोन तासात शोधले

गोंदिया : शहराच्या गाैतमनगरातील एक अल्पवयीन मुलगी आपल्या प्रियकरासोबत १२ सप्टेंबर रोजी दुपारी २.३० वाजता पळून गेली होती. या प्रकरणाची तक्रार मुलीच्या आईने गोंदिया शहर पोलीस ठाण्यात करताच पोलिसांनी अवघ्या दोन तासात त्या मुलीला गोंदिया तालुक्याच्या कामठा-पांजरा येथून पकडून आणले. १७ वर्ष ११ महिने १५ दिवसाची असलेली मुलगी आपल्या प्रियकरासोबत पळून गेली होती. यासंदर्भात तिच्या आईच्या तक्रारीवरून प्रियकर पंकज सुरेश मेश्राम (२०) रा. दहेगाव याच्याविरुद्ध गोंदिया शहर पोलिसांनी भादंविच्या कलम ३६३ अन्वये गुन्हा दाखल केला. मुलगी अल्पवयीन असल्याने तिचा शोध घेण्यासाठी गोंदिया शहर पोलिसांनी तपासाची चक्रे त्वरित हलविली. पोलीस निरीक्षक महेश बनसोडे यांच्या मार्गदर्शनाखाली सहायक पोलीस निरीक्षक विजय राणे, पोलीस नायक प्रकाश गायधने, सुबोध बिसेन, जे. डी. उईके, वंदना पटले, महिला पोलीस भादणकर यांनी अवघ्या दोन तासाच्या आत त्या मुलीचा शोध घेऊन घरच्या लोकांच्या स्वाधीन केले. तिच्या प्रियकराला पोलिसांनी ताब्यात घेतले.