वटवाघळाचा ब्रिटनहून रशियापर्यंत रेकॉर्डब्रेक प्रवास; पोहोचताच मांजरीच्या तावडीत सापडला

Nathusius’ pipistrelle नावाचे हे वटवाघुळ मानवाच्या अंगठ्याच्या आकाराचे होते. हे वटवाघुळ रशियाच्या एका गावात सापडले.

मॉस्को: प्राणी, पक्ष्यांची स्थलांतर करण्याची बाब त्यांच्या जिवनातील एक सामान्य प्रक्रिया असते. मात्र, एका वटवाघळाने (BAT) सर्व रेकॉर्डच तोडले आहेत. त्याने ब्रिटेन ते रशिया असा हजारो किमींचा प्रवास केला. आजवरचा हा वटवाघळाने केलेला सर्वात लांबचा प्रवास होता. दुर्दैव म्हणजे हा या वटवाघळाचा शेवटचा प्रवास ठरला. रशियात पोहोचताच तेथील एका मांजराने या वटवाघळाची शिकार केली. (A bat has made it to the headlines who travelled from London to Russia, but ultimately got killed by a cat.)

Nathusius’ pipistrelle नावाचे हे वटवाघुळ मानवाच्या अंगठ्याच्या आकाराचे होते. हे वटवाघुळ रशियाच्या एका गावात सापडले. या वटवाघळाची ओळख पटविण्यासाठी 2016 मध्ये हिथ्रोजवळील कंट्री पार्कमध्ये एक गोल रिंग गळ्यात अडकविण्यात आली होती. डेलीमेलच्या वृत्तानुसार ब्रिटनपासून एवढ्या दूरवर खूप कमी प्राणी गेले आहेत. या वटवाघळाला 30 जुलैला एका अॅनिमल रेस्क्यू टीमने पाहिले. त्याला एका मांजराने जखमी केले होते. 

यानंतर या वटवाघळाचा मृत्यू झाला. त्याच्या मृत्यूनंतर त्याची रिंग पाहिली गेली. तेव्हा हे वटवाघुळ लंडनहून एवढे लांब आले होते, हे समोर आले. या वटवाघळाला तो टॅग लावणाऱ्या ब्रायन ब्रिग्स यांच्या म्हणण्यानुसार, त्याचा प्रवास खूप रोमांचक होता. टॅगमुळे त्यांच्या संरक्षण कार्याचे महत्व किती असते ते समजते. यामुळे प्राण्यांच्या स्थलांतराच्या ट्रेंडचा सखोल अभ्यास करण्य़ासाठी उपयुक्त आहे. 

Nathusius’ pipistrelle च्या स्थलांतराचा पॅटर्न अद्याप समजलेला नाही. काही वटवाघळे ही थंडीच्या काळात पूर्व किंवा पश्चिम युरोपकडून ब्रिटनला येतात. या आधी एक वटवाघूळ 2017 मध्ये लातवियाहून स्पेनला गेले होते. त्याने देखील 2000 किमीपेक्षा जास्त अंतर कापले होते. रशिया आणि ब्रिटनचे तज्ज्ञ एकत्र काम करून यावर संशोधन करत आहेत.