'दाऊद पाकिस्तानात असला तर असू दे, भारताला मदत करण्याचा काय संबंध?'

दाऊद इब्राहिम पाकिस्तानात असला तरी त्याचा शोध घेण्यासाठी पाकिस्तान कधीच भारताला मदत करणार नाही असं वक्तव्य पाकिस्तानचे माजी राष्ट्राध्यक्ष परवेझ मुशर्रफ यांनी केलं आहे

इस्लामाबाद, दि. 31 - दाऊद इब्राहिम पाकिस्तानात असला तरी त्याचा शोध घेण्यासाठी पाकिस्तान कधीच भारताला मदत करणार नाही असं वक्तव्य पाकिस्तानचे माजी राष्ट्राध्यक्ष परवेझ मुशर्रफ यांनी केलं आहे. तसं पहायला गेलं तर परवेझ मुशर्रफ यांनी एकाप्रकारे अंडरवर्ल्ड डॉन आणि १९९३ च्या मुंबई बॉम्बस्फोटाचा सूत्रधार दाऊद इब्राहिम पाकिस्तानमध्ये असल्याचं मान्य केलं आहे. पाकिस्तानमधील चॅनेलला मुलाखत देताना परवेझ मुशर्रफ यांनी हे वक्तव्य केलं आहे. 

मुलाखतीत बोलताना परवेझ मुशर्रफ यांनी दाऊद इब्राहिमला पाठिंबा देताना, 'भारतात मुस्लिमांची हत्या होते, आणि दाऊद त्यावर प्रतिक्रिया देतो', असंही म्हटलं आहे. 'भारत गेल्या कित्येक वर्षांपासून पाकिस्तानला बदनाम करत आहे. आता आम्ही लगेच चांगले वागून भारताला मदत करण्याचा काय संबंध ? दाऊद कुठे आहे मला माहित नाही. तो येथेच कुठेतरी असू शकतो', असं परवेझ मुशर्रफ बोलले आहेत. 

भारताने अनेकदा दाऊद पाकिस्तानात वास्तव्य करत असल्याचा पुरावा दिला आहे. मात्र भारताने पुरावे देऊनही पाकिस्तानने वारंवार त्याचा आमच्या देशात ठावठिकाणा नसल्याचा दावा केला आहे. दाऊद कराचीत राहत असल्याचा दावा भारताने केला असून, तसे पुरावेही सादर केले आहेत. 

दाऊद इब्राहिम तीन पत्ते आणि 21 नावांनिशी पाकिस्तानमध्ये वास्तव्यास 
अंडरवर्ल्ड डॉन दाऊद इब्राहिम पाकिस्तानमध्ये तीन वेगवेगळ्या पत्त्यावर आणि 21 नावांनिशी राहत असल्याची माहिती समोर आली होती. इंग्लंडच्या महसूल विभागाने ही माहिती उघड केली होती. मोस्ट वॉण्टेड दहशतवादी म्हणून ७ नोव्हेंबर २००३ मध्ये दाऊदविरोधात आंतरराष्ट्रीय स्तरावर अटक वॉरंट जारी करण्यात आले होते. त्यानंतर तो पाकिस्तानमध्येच वास्तव्यास असल्याते समोर आले आहे.

गेल्या वर्षी लंडनमधील महसूल विभागाने दाऊदची आर्थिक नाकेबंदी करताना त्याच्या लंडनमधील आर्थिक व्यवहारांवर निर्बंध आणले होते. मिळालेल्या माहितीनुसार इंग्लंडकडून दाऊदला असेट्स फ्रीज लिस्टमध्ये टाकले आहे. यामध्ये दाऊदच्या पाकिस्तानमधील तीन पत्त्याचा आणि 21 नावांचा समावेश आहे. इंग्लंडच्या वित्त मंत्रालयाने 'फायनँशियल सेक्शन्स टार्गेट्स इन द यूके' या नावाने यादी जारी केली आहे. यामध्ये दाऊद इब्राहिम कासकर या नावाने खोली क्रमांक ३७, डिफेन्स रोड, हाऊसिंग अ‍ॅथॉरिटी, कराची, पाकिस्तान. तर दुसरा पत्ता खोली क्रमांक २९, मरगाला रोड, एफ ६-२ स्ट्रीट नंबर २२, कराची, पाकिस्तान. नूरबाद, पाकिस्तान, कराची, (त्याशिवाय पाकिस्तान पलातियाल बंगला, हिल परिसर) आणि व्हाईट हाऊस, सौदी मशिदीजवळ, किल्फटन, कराची, पाकिस्तान. असे गोंधळवून टाकणारे पत्ते त्याने दिले आहेत.

दाऊदचं राष्ट्रीयत्व भारतीय असून त्याचा पासपोर्ट भारताने रद्द केल्यानंतर त्याने भारतीय व पाकिस्तानी अनेक बनावट पासपोर्ट केले व त्याचा गैरवापर केला आहे, असेही यात म्हटले होते. 1993 साली मुंबई बॉम्बस्फोटाप्रकरणी दाऊद मुख्य आरोपी आहे. 12 मार्च 1993 रोजी 13 ठाकाणी झालेल्या शक्तिशाली साखळी बॉम्बस्फोटात 257 जण ठार तर 713 जण जखमी झाले होते.