वाटूर फाटा येथील बीअर बार फोडणारा चोरटा अटकेत

सदर बाजार पोलिसांची कारवाई : एक लाख ११ हजार १८० रुपयांचा मुद्देमाल जप्त

जालना : परतूर तालुक्यातील वाटूर फाटा येथील बीअरबार फोडून विदेशी दारूच्या बाटल्या चोरून नेणाऱ्यास सदर बाजार पोलिसांनी सोमवारी अटक केली. शेख आमेर शेख साबेर (२६, रा. शेरसवारनगर, जालना), असे अटक केलेल्या संशयित आरोपीचे नाव आहे. विदेशी दारूच्या बाटल्यांसह १ लाख ११ हजार १८० रुपयांचा मुद्देमाल जप्त करण्यात आला आहे.

जालना शहरातील तोतला पेट्रोलपंपाच्या मागे असलेल्या एका पत्राच्या शेडमध्ये एक व्यक्ती चढ्या भावाने दारूची विक्री करीत असल्याची माहिती पोलीस निरीक्षक संजय देशमुख यांना मिळाली. या माहितीवरून पोनि. देशमुख यांनी पथकाला पाठवून शेख आमेर शेख साबेर यास ताब्यात घेतले. पत्राच्या शेडची पाहणी केली असता, त्यात १७ विदेशी दारूचे बॉक्स आढळून आले. सदरील बॉक्स जप्त करून त्याला अधिक विचारपूस केली असता, त्याने भाऊ शेख आरेफ शेख साबेर याच्या मदतीने वाटूर फाटा येथील बीअरबार फोडून विदेशी दारूचे बॉक्स चोरून आणल्याची कबुली दिली. त्याच्याकडून १ लाख ११ हजार १८० रुपयांचे विदेशी दारूचे बॉक्स जप्त करण्यात आले आहेत. ही कारवाई पोलीस अधीक्षक विनायक देशमुख, अपर पोलीस अधीक्षक विक्रांत देशमुख, उपविभागीय पोलीस अधीकारी सुधीर खिरडकर यांच्या मार्गदर्शनाखाली पोनि. संजय देशमुख, पोउपनि. रमेश रूपेकर, पोलीस अंमलदार समाधान तेलंग्रे, कैलास खार्डे, दीपक घुगे, फुलचंद गव्हाणे, अशोक जाधव, सुधीर वाघमारे, राजू वाघमारे, योगेश पठाडे, आगळे, वैशाली जावळे, सुमित्रा अंभोरे यांनी केली.