परदेशामध्ये गाडी चालविण्याच्या परवान्याचे नूतनीकरणही करता येणार

सचिन देव

लोकमत न्यूज नेटवर्क

जळगाव : कोणत्याही देशात वाहन चालविण्यासाठी वाहन परवाना असणे गरजेचे असते. विदेशात तर हे नियम अत्यंत कडक आहेत. मात्र, मुदत संपलेले परवान्यांचे नूतनीकरण आता आरटीओ कार्यालयातही होत असल्यामुळे नागरिकांच्या सोयीचे झाले आहे. जळगाव आरटीओ कार्यालयात दरवर्षी परवान्यांची नूतनीकरणाची संख्या मोठी आहे. मात्र, कोरोना संसर्गामुळे नूतनीकरण करणाऱ्यांची संख्या घटली असून, गेल्या पावणेदोन वर्षांत फक्त ३१ जणांनी परवान्यांचे नूतनीकरण केले आहे.

उपप्रादेशिक परिवहन विभागाने दिलेल्या माहितीनुसार, परदेशात वाहने चालविण्याचे परवाने काढण्यासाठी स्वतंत्र कर्मचाऱ्यांची नियुक्ती करण्यात आली आहे. स्थानिक वाहन परवाना काढण्यासाठी ज्याप्रमाणे ऑनलाईन अर्ज करावा लागतो, त्याप्रमाणे परदेशी वाहन परवान्यांच्या नूतनीकरणासाठी ऑनलाईन अर्ज करणे बंधनकारक करण्यात आले आहे. ऑनलाईन अर्ज केल्यानंतर नागरिकांना आरटीओ कार्यालयातर्फे तारीख दिली जाते. त्या तारखेला आरटीओ कार्यालयात जाऊन त्या नागरिकांनी मूळ पासपोर्ट, व्हिसा आणि वाहन परवाना दाखविणे गरजेचे आहे. तसेच मूळ वाहन परवान्यावरील पत्ता व पासपोर्टचा पत्ता हा एकच असणे आवश्यक आहे. यावेळी आरटीओ विभागातर्फे संबंधित नागरिकांच्या कागदपत्रांची पडताळणी करून नूतनीकरण केले जात आहे. नूतनीकरणासाठी ५०० रुपयांचे शुल्क आकारण्यात येत आहे.

इन्फो :

असा काढावा आंतराष्ट्रीय परवाना

- परदेशात वाहन चालविण्याचा परवाना काढण्यासाठी आरटीओ नियमानुसार ऑनलाईन अर्ज करणे बंधनकारक करण्यात आले आहे.

- ऑनलाईन अर्ज केल्यानंतर, शुल्कदेखील ऑनलाईनच भरणे गरजेचे आहे. त्यानंतर शुल्क भरल्याची प्रिंट काढून आरटीओ कार्यालयात सादर करावी लागते. आरटीओ कार्यालयाकडे पासपोर्ट, व्हिसा आणि वाहन परवाना दाखवावा लागतो. मात्र, ही कागदपत्रे दाखविण्यासाठी मूळ कागदपत्रे घेऊन जाणे गरजेचे आहे.

- यानंतर आरटीओ कार्यालयाकडून या मूळ कागदपत्रांची पडताळणी करण्यात येते. त्यानंतर संबंधित नागरिकाला एका वर्षाच्या मुदतीसाठी परवाना देण्यात येत आहे.

- एका वर्षाचा परवाना संपल्यानंतर, पुन्हा नव्याने अर्ज करून हा परवाना काढावा लागतो.

इन्फो :

कोण काढू शकतो हा परवाना

- ज्या नागरिकांकडे परदेशात राहण्याचा व्हिसा व पासपोर्ट आहे, अशा नागरिकांना आंतराष्ट्रीय वाहन परवाना दिला जातो.

- वाहन परवाना देताना आरटीओ प्रशासनातर्फे संबंधित नागरिकाचे मुळ लायसन्स पाहूनच पुढील प्रक्रिया केली जाते.

- मुळ वाहन परवान्यावरील पत्ता व पासपोर्टवरील पत्ता हा एकच असणे गरजेचे आहे. कागदपत्रांची प्रक्रिया पूर्ण केल्यानंतर, एका दिवसात हा वाहन परवाना दिला जातो.

इन्फो

आरटीओ कार्यालयातर्फे परदेशात गाडी चालविण्यासाठी परवान्याच्या नुतनीकरणासाठी नियमाप्रमाणे ऑनलाईन अर्ज करावा लागतो. संबंधित नागरिकांकडे अगोदरचे लायसन्स् असल्यामुळे पुन्हा त्यांची कुठलीही परीक्षा घेतली जात नाही. तसेच परवान्यासाठी नुतनीकरणाचे इतर सर्व साधारण लायसन्स् प्रमाणे ५०० रूपये शुल्क आकारले जाते.

श्याम लोही, उप प्रादेशिप परिवहन अधिकारी, जळगाव

इन्फो :

कोरोनाकाळात संख्या घटली

२०१८ - ५४

२०१९ - ५८

२०२० - २४

२०२१-७