खड्ड्यांचा वाढदिवस साजरा करत सत्ताधाऱ्यांचा निषेध

राष्ट्रवादीचे आगळे-वेगळे आंदोलन

लोकमत न्यूज नेटवर्क

जळगाव - शहरातील खड्ड्यांचा प्रश्न आता बिकट झाला असून, बुधवारी राष्ट्रवादी कॉंग्रेसच्यावतीने भंगार बाजार परिसरातील रस्त्यावर असलेल्या खड्ड्यांचा केक कापून वाढदिवस साजरा करण्यात आला. मनपातील सत्ताधाऱ्यांनी शहरातील रस्त्यांची वाट लावली असून, मनपा निवडणुकीच्या वेळेस केवळ घोषणांचा बाजार सत्ताधाऱ्यांनी मांडला आहे. त्यामुळे ख‌ड्ड्यांचा वाढदिवस साजरा करून मनपातील सत्ताधाऱ्यांचा निषेध या आंदोलनातून करण्यात आल्याचे राष्ट्रवादीच्या पदाधिकाऱ्यांकडून यावेळी सांगण्यात आले.

आंदोलनात राष्ट्रवादी कॉंग्रेसचे वक्ता प्रशिक्षणचे महानगर जिल्हाध्यक्ष साहिल पटेल, अशोक लाडवंजारी, ममता तडवी ,पंकज नाले यांच्यासह इतर पदाधिकारी उपस्थित होते. सत्ताधारी भाजपने निवडणुकीच्या वेळेस शहराचा कायापालट करू, असे आश्वासन दिले होते; मात्र सत्ताधारी भाजपला या आश्वासनाचा विसर पडलाय की काय ? असा सवाल राष्ट्रवादीने उपस्थित केला. जळगावकरांना दररोज खड्ड्यांच्या समस्यांमुळे अपघाताना सामोरे जावे लागत आहे. सत्ताधारी भाजपचा निषेध करण्यासाठी राष्ट्रवादीने खड्ड्यांमध्ये केक कापून खड्ड्यांचा वाढदिवस साजरा केला. मनपा प्रशासनाने व सत्ताधाऱ्यांनी शहरातील रस्त्यांची केलेली दुर्दशा लवकरात लवकर दुरुस्ती करावी, अन्यथा जोरदार आंदोलन करण्यात येईल, असा इशारा राष्ट्रवादीच्या पदाधिकाऱ्यांनी दिला आहे.