अमळनेरात दोघांची गळफास घेऊन आत्महत्या

अमळनेर शहरात दोघांनी गळफास घेऊन आत्महत्या केली आहे. त्यामध्ये युनियन बॅंकेच्या कर्मचाऱ्याचाही समावेश आहे.

ठळक मुद्देयुनियन बॅंकेच्या कर्मचाऱ्याचाही समावेश.

लोकमत न्यूज नेटवर्क

अमळनेर : शहरात दोघांनी गळफास घेऊन आत्महत्या केली आहे. त्यात युनियन बँकेच्या कर्मचाऱ्याजवळ चिठ्ठी आढळून आली असून त्यात दोघांकडून छळ होत असल्याचे म्हटले आहे.

युनियन बँकेचा कर्मचारी सागर एकनाथ पाटील (२८, नायगाव, ता. यावल, ह. मु. सुरभी कॉलनी अमळनेर) याने त्याच्या राहत्या घरी आतून कडी लावून पंख्याच्या छताला दोरी बांधून गळफास घेऊन आत्महत्या केली. सागराला डबा देणारा प्रसाद बाविस्कर डबा द्यायला गेला असता ह. घटना उघडकीस आली. त्याच्याजवळ सुसाईड नोट आढळून आली. त्यात त्याने संतोष पातोडे व स्वप्नील शिंदे (त्र्यंबकेश्वर, जि. नाशिक) टॉर्चर करीत असल्याचे लिहिल्याचे समजते. त्यांना सोडू नका, असेही त्यात म्हटल्याचे समजते. बँकेचे मॅनेजर अजय शुक्ला यांनी खबर दिल्यावरून पोलिसात अकस्मात मृत्यूची नोंद करण्यात आली आहे. तपास हेड कॉन्स्टेबल ठाकरे करीत आहेत.

दुसऱ्या घटनेत गांधलीपुरा भागातील प्रशांत संजय धामणे याने ४ रोजी रात्री ११ वाजेच्या सुमारास वरच्या मजल्यावर लोखंडी अँगलला बेडशीट बांधून गळफास घेऊन आत्महत्या केली आहे. प्रशांतचे आजोबा अशोक देविदास लोहरे यांनी खबर दिल्यावरून अमळनेर पोलीस स्टेशनला अकस्मात मृत्यूची नोंद करण्यात आली आहे. तपास हेडकॉन्स्टेबल सुनील हटकर करीत आहेत.