उन्हाळी पिके, पिण्यासाठी पाणी सोडा

तापी नदी ही भारताच्या पश्चिम भागातून वाहणारी प्रमुख नदी आहे. ही पश्चिम वाहिनी नदी भारताच्या मध्यप्रदेश, महाराष्ट्र, गुजरात या राज्यांतून वाहते. तापी नदीवर मुख्यत्वे उकाई धरण, काकरापार धरण व हतनूर धरण बांधण्यात आलेले आहे. त्यापैकी हतनूर धरणातून तापी नदीत हक्काचे व हिश्श्याचे एक आवर्तन सोडण्यात यावे, अशी मागणी चोपडा तालुकावासीयांतर्फे गोरगावलेचे माजी सरपंच जगन्नाथ टी. बाविस्कर यांच्यासह परिसरातील शेतकऱ्यांनी केली आहे.

नदी अखंड वाहत राहावी

तापी नदीत पाण्याचा प्रवाह अखंड वाहत राहिला पाहिजे, अशीही मागणी याआधीच झालेली आहे. कारण पावसाळा संपला की तापीत पाण्याचा प्रवाह खंडित होऊन नदीचे पात्र कोरडेठाक होत असते. धरणाच्या वरील भागात मुबलक पाणी असल्याने तो भाग सुजलाम् सुफलाम् होतो. धरणाखालील भागात पाणी वाहत नसल्याने टंचाई निर्माण होत असते. यासाठी तालुकाभरातून ह्या मागणीला शेकडो लोकांनी दुजोरा दिलेला आहे.

----

विहिरींची पाणी पातळी खोल

यावर्षीच्या कडक उन्हाळ्यामुळे तालुक्यातील कूपनलिका व विहिरींची पाण्याची पातळी खूपच खोल गेलेली आहे. त्यामुळे सध्या शेतात असलेली केळी, ऊस, पपई व इतर भाजीपाला पिकांना पाणी कमी पडत आहे. तसेच पुढील काळात कापूस व इतर पिके लागवड करतानासुद्धा पाण्याची गरज भासणार आहे. म्हणून हतनूर धरणातून तापी नदीत पाण्याचे एक आवर्तन सोडणे गरजेचे आहे. अशा आशयाचे निवेदन राज्याचे जलसंपदामंत्री जयंतराव पाटील, पाणीपुरवठा व पालकमंत्री गुलाबराव पाटील, जळगावचे जिल्हाधिकारी, चोपड्याचे तहसीलदार यांना देण्यात आलेले आहे. या निवेदनावर तालुकावासीयांतर्फे चोपडा मार्केट कमिटीचे माजी संचालक जगन्नाथ बाविस्कर (गोरगावले बुद्रुक), आदर्श घुमावल बु.चे सरपंच वसंतराव पाटील, चोपडा राष्ट्रवादीचे माजी तालुका युवा अध्यक्ष दीपक सोनवणे (हातेड खुर्द), सामाजिक कार्यकर्ते मधुसूदन बाविस्कर, वैभवराज बाविस्कर (चोपडा) यांच्यासह शेतकऱ्यांच्या स्वाक्षऱ्या आहेत.

फोटो - २७सीडीजे १