नियुक्ती आदेशाच्या पंचवीस दिवसानंतर अखेर प्रशासन अधिकारी रूजू !

लोकमत न्यूज नेटवर्क

जळगाव : नियुक्ती आदेशाच्या पंचवीस दिवसानंतर अखेर जळगाव मनपा शिक्षण मंडळाचे प्रशासन अधिकारी आर.बी.पाटील मंगळवारी रूजू झाले. यामुळे काही प्रमाणात का होईना, पण मनपा शिक्षण मंडळातील रखडलेल्या कामांना गती मिळणार आहे.

जळगाव मनपा शिक्षण मंडळाचे प्रशासन अधिकारी डी.टी.ठाकूर २८ फेब्रुवारी सेवानिवृत्त झाले आहेत. त्यामुळे जळगाव मनपा शिक्षण मंडळाचा पदभार हा जळगाव माध्‍यमिक शिक्षण विभागातील सहाय्यक शिक्षण उपनिरिक्षक आर.एल.माळी यांच्याकडे सोपविण्‍यात आला होता. पण, ते ३० एप्रिल रोजी ते सेवानिवृत्त होत असल्यामुळे त्यांनी पदभार स्वीकारण्यास असमर्थता दर्शविली होती. त्यामुळे जळगाव शिक्षण मंडळावर तात्पुरत्या स्वरूपाचे प्रशासन अधिकारी म्हणून नंदुरबार माध्‍यमिक शिक्षण विभागातील आर.बी.पाटील यांच्याकडे कार्यभार सोपविण्‍यात आला होता. हे नियुक्ती आदेश २६ मार्च रोजी काढण्‍यात आले आहे. दरम्यान, मध्‍यंतरी त्यांनी जळगावचा पदभार स्वीकारण्यास असमर्थता दर्शविली होती. मात्र, नियुक्ती आदेशाच्या पंचवीस दिवसानंतर अखेर मंगळवारी त्यांनी जळगाव मनपा प्रशासन अधिकारी पदाचा पदभार स्वीकारला आहे. गेल्या दोन महिन्यांपासून शिक्षण मंडळातील काम रखडले होते. शिक्षक, सेवानिवृत्तांच्या वेतनाचा प्रश्नही रखडला होता. मात्र, प्रशासन अधिकारी रूजू झाल्यामुळे या कामांना देखील गती मिळणार आहे.