तरुणीला शरीरसंबध ठेवण्यास महिलेने भाग पाडले

फोटो

लोकमत न्यूज नेटवर्क

जळगाव : ओळखीच्या महिलेनेच अठरा वर्षांच्या तरुणीला शरीरसंबंध ठेवण्यास भाग पाडल्याचा धक्कादायक प्रकार उघडकीस आला आहे. याप्रकरणी पीडितेच्या फिर्यादीवरून महिलेच्या मदतीने तरुणीवर बलात्कार केल्याची घटना ७ एप्रिल रोजी उघडकीला आली आहे. कुटुंबीयांनी विश्वासात घेऊन पीडितेच्या फिर्यादीवरून विवेक महेंद्र मराठे (वय २०, रा. हरिविठ्ठल नगर) या तरुणाविरुद्ध एमआयडीसी पोलिसांत बलात्काराचा गुन्हा दाखल करण्यात आला आहे. आरती सचिन महाजन (रा. शहापूर, जि. बऱ्हाणपूर, मध्य प्रदेश) हिलाही आरोपी करण्यात आले आहे.

दरम्यान, शनिवारी रात्री गुन्हा दाखल झाल्यानंतर रविवारी दोघांना अटक करण्यात आली. न्यायालयात हजर केले असता मराठे याला १३ एप्रिलपर्यंत पोलीस कोठडी, तर आरतीला न्यायालयीन कोठडी सुनावली.

पोलिसांकडून मिळालेली माहिती अशी की, तालुक्यातील एका गावात १८ वर्षीय तरुणी आपल्या कुटुंबीयांसह राहते. तरुणीची आरती सचिन महाजन या महिलेशी ओळख होती. ७ एप्रिल रोजी रात्री ११ वाजेच्या सुमारास तरुणी एकटी घरी असताना आरती महाजन हिने विवेक मराठे याला तू आवडतेस, त्याच्याशी शारीरिक संबंध कर, नाही तर तुमचे शारीरिक संबंध झाले आहेत असे तुझ्या आई, वडिलांना खोटे सांगेन म्हणत धमकी देली. आरती हिने विवेक मराठेशी संबंध ठेवण्यास भाग पाडले, हा प्रकार कुणाला सांगितला तर जिवे ठार मारण्याची धमकी दिली, असे पीडितेने फिर्यादीत म्हटले आहे.

याप्रकरणी पीडित तरुणीच्या फिर्यादीवरून एमआयडीसी पोलीस ठाण्यात गुन्हा दाखल करण्यात आला. पोलीस उपनिरीक्षक विशाल वाठोरे यांनी गुन्ह्यातील दोघांना रविवारी न्यायालयात हजर केले असता संशयित आरोपी विवेक मराठेला १३ एप्रिलपर्यंत पोलीस कोठडी, तर संशयित आरोपी महिलेला न्यायालयीन कोठडी सुनावली आहे.