रिक्षाची दुचाकीला धडक महिला पोलीस कर्मचारी जखमी

भरधाव रिक्षाची धडक बसून झालेल्या अपघातात महिला पोलीस कर्मचारी जखमी झाल्याची घटना घडली.

लोकमत न्यूज नेटवर्क

कल्याणः भरधाव रिक्षाची धडक बसून झालेल्या अपघातात महिला पोलीस कर्मचारी जखमी झाल्याची घटना शुक्रवारी रात्री पावणेदहाच्या सुमारास घडली. रेखा शिवाजी फटांगरे (वय ३६ ) असे जखमी महिला पोलीस कर्मचा-याचे नाव आहे. त्या आधारवाडी कारागृहात कार्यरत आहेत. 

शुक्रवारी डयुटी संपवून त्या मोहना, आंबिवली येथील घरी गेल्या. त्यांच्या मुलाची तब्येत बरी नसल्याने त्याला दुचाकीवरून बिर्ला महाविद्यालया नजीक असलेल्या खाजगी रुग्णालयात दवाउपचारासाठी त्या घेऊन आल्या. रात्री पावणेदहाच्या सुमारास औषध घेऊन मुलासह दुचाकीवरून घरी परतत असताना पाठिमागून भरधाव वेगात येणाऱ्या रिक्षाची त्यांच्या दुचाकीला जोरदार धडक बसली. 

यात दुचाकीवरुन रेखा आणि त्यांचा मुलगा खाली रस्त्यावर पडले. यात रेखा यांना कंबरेला, पाठीला आणि उजव्या डोळयाच्या खाली मार लागला. ही घटना बंदरपाडा येथे घडली. दरम्यान घटना घडताच रिक्षाचालक पसार झाला असून रेखा यांना उपचारार्थ खाजगी रुग्णालयात दाखल करण्यात आले आहे. रेखा यांच्या तक्रारीवरून रिक्षाचालकाविरोधात खडकपाडा पोलीस ठाण्यात गुन्हा दाखल झाला आहे.