वळीवडेत बंद फ्लॅटचे कुलूप तोडून ७२ हजार रुपयांचे दागिने लंपास

वळीवडे (ता. करवीर) येथील कोयना कॉलनी परिसरात पुराचे पाणी आल्याने बंद असलेल्या फ्लॅटचे कुलूप तोडून बेडरूममधील कपाट उचकटून सुमारे ७२ हजार रुपयांचे सोन्याचे दागिने अज्ञात चोरट्याने लंपास केले. पुराचे पाणी कमी झाल्यानंतर मंगळवारी ही चोरी उघडकीस आली. याबाबत राकेश चंदरलाल सचदेव (वय ३३, रा. वळीवडे, ता.करवीर) यांनी गांधीनगर पोलिसांत फिर्याद दिली आहे.

राकेश सचदेव यांचे गांधीनगर मुख्य रस्त्यावर आराध्या ट्रेडिंग नावाचे कारपेट दुकान आहे. सचदेव हे आपले वडील, भाऊ, भावजय यांच्यासह वळीवडे हद्दीत कोयना कॉलनी परिसरात राहतात. पुराचे पाणी वाढल्यामुळे ते दि. २३ जुलैला फ्लॅटला कुलूप लावून नातेवाईक यांच्या घरी राहण्यास गेले होते. मंगळवारी दि. २७ रोजी पुराचे पाणी कमी झाल्याने सचदेव कुटुंब परत घरी गेले असता ही चोरीची घटना उघडकीस आली. घटनास्थळी गांधीनगरचे सपोनि राजेश खांडवे व पोलीस उपनिरीक्षक अतुल कदम यांनी भेट दिली.