दोन दुचाकींची धडक; दाम्पत्य जखमी

लोकमत न्यूज नेटवर्क

कोल्हापूर : सुभाषनगर चौक ते सायबर चौक दरम्यान रिंगरोडवर छत्रपती चौकात भरधाव वेगाने व हयगयीने दुचाकी चालवून समोरील दुचाकीला पाठीमागून ठोकरल्याने त्यावरील दाम्पत्य जखमी झाले आहे. संध्या आकाश लोहार व त्यांचे पती आकाश लोहार (दोघेही रा. भारतनगर, साळोखे पार्क) अशी जखमींची नावे आहेत. लोहार दाम्पत्य हे रु्ग्णालयातून उपचार घेऊन घरी परतत असताना हा अपघात झाला. याप्रकरणी राजारामपुरी पोलीस ठाण्यात अज्ञात दुचाकीस्वारावर गुन्हा दाखल झाला आहे.

दुचाकी चोरी

कोल्हापूर : शिवाजी पार्क येथील श्रीकृष्ण बंगला येथे घरानजीक उभा केेलेली दुचाकी अज्ञाताने लॉक तोडून लंपास केली. याप्रकरणी दुचाकीमालक मुरली अशोक रोहिडा (वय ४२, रा. शिवाजी पार्क) यांनी दुचाकी चोरीची तक्रार शाहुपूरी पोलीस ठाण्यात दिली आहे.

मोटारीला पाठीमागून दुचाकीची धडक

कोल्हापूर : बंद पडलेली मोटार दुसऱ्या चारचाकी वाहनाने ओढून आणत असताना पाठीमागून भरधाव वेगाने आलेल्या दुचाकीस्वाराने मोटारीला जोरदार धडक दिली. या अपघातात दुचाकीस्वार निवास बाजीराव भोसले ( रा. उत्तरेश्वर पेठ) हा युवक गंभीर जखमी झाला. दरम्यान, अपघाताची माहिती न मिळालेली दोन्हीही चारचाकी वाहने पुढे गेली. पुढे नागरिकांनी ही वाहने अडवली. त्यावेळी त्यावरील चालक अजिंक्य राजेंद्र माळी (रा. साठमारी गल्ली, मंगळवार पेठ) याने जखमी भोसले याला तातडीने उपचारासाठी रुग्णालयात दाखल केले.