राजेंद्रनगरात भांडणे सोडविण्यावरच चाकू हल्ला

कोल्हापूर : पूर्ववैमनस्यातील वाद सोडविण्यासाठी गेलेल्या युवकांवर चाकू हल्ला करण्याचा प्रकार राजेंद्रनगरातील पटांगणानजीक घडला. याप्रकरणी चौघांवर राजारामपुरी पोलीस ठाण्यात गुन्हा नोंदवला आहे. ऋषिकेश श्रीमंत शिंदे (वय २१ रा. राजेंद्रनगर) असे जखमीचे नाव आहे.

पोलिसांनी दिलेली माहिती अशी की, ऋषिकेश शिंदे यांच्या मामाचे व त्र्यंबक गवळी यांच्यात पूर्ववैमनस्यातून वाद होता. यातून वादावादी सुरू होती. त्याचवेळी शिंदे हा वाद सोडवण्यासाठी मध्यस्ती करत होता. त्यावेळी त्याने मामाला घेऊन बाजूला येत असताना चौघा संशयितांनी शिंदे याच्यावरच चाकू हल्ला केला. यामध्ये शिंदे यांच्या हातावर वार झाल्याने ते जखमी झाले. ही घटना बुधवारी रात्रीच्या सुमारास घडली. याप्रकरणी त्यांनी राजारामपुरी पोलीस ठाण्यात दिलेल्या तक्रारीवरून पोलिसांनी संशयित आरोपी त्रंबक गवळी, श्रीमंत गवळी, कुमार गायकवाड, सलीम अफखान (सर्व रा. राजेंद्रनगर) यांच्यावर गुन्हा नोंदवला आहे.