सतेज पाटील यांना अभिमान वाटेल असे काम करू - जयंत आसगावकर

कोल्हापूर : पुणे शिक्षक मतदारसंघासाठी पालकमंत्री सतेज पाटील यांनी आपल्यावर विश्वास ठेवून जे सहकार्य केले, त्याबद्दल त्यांचा ऋणी आहे. आगामी काळात त्यांना अभिमान वाटेल असेच काम करू. त्यांचा शब्द खाली पडू देणार नाही, अशी ग्वाही आमदार जयंत आसगावकर यांनी दिली.

विधान परिषदेच्या शिक्षक मतदार संघाचे नूतन आमदार प्रा. जयंत आसगावकर यांचे शनिवारी कोल्हापुरात आगमन झाल्यानंतर त्यांनी ‘अजिंक्यतारा’ येथे जाऊन पालकमंत्री सतेज पाटील यांची भेट घेतली. यावेळी ते बोलत होते. पालकमंत्री पाटील यांनी आमदार आसगावकर यांचा सत्कार केला. याप्रसंगी आमदार ऋतुराज पाटील, आमदार चंद्रकांत जाधव यांनीही आमदार आसगावकर यांना शुभेच्छा दिल्या. माजी महापौर निलोफर आजरेकर, ‘गोकुळ’चे माजी संचालक बाबासाहेब चौगुले, शिक्षक नेते भरत रसाळे, खंडेराव जगदाळे, दादासाहेब लाड, समीर घोरपडे, माजी नगरसेवक शारंगधर देशमुख ,मधुकर रामाणे यांच्यासह शिक्षण संघटनेचे पदाधिकारी उपस्थित होते.

फोटो ओळी : पुणे शिक्षक मतदारसंघाचे नूतन आमदार जयंत आसगावकर यांनी शनिवारी कोल्हापुरात ‘अजिंक्यतारा’ येथे जाऊन पालकमंत्री सतेज पाटील यांची भेट घेऊन आभार मानले. यावेळी कॉग्रेसच्या कार्यकर्त्यांनी आमदार आसगावकर, पालकमंत्री सतेज पाटील व आमदार ऋतुराज पाटील यांना एकच पुष्पहार घालून सत्कार केला. (फोटो-०५१२२०२०-कोल-आसगावकर सत्कार)

- राजाराम लोंढे