Radhanagari Vidhan Sabha Election Result 2024: राधानगरी मतदारसंघातून शिंदेसेनेच्या प्रकाश आबिटकर यांची निर्णायक आघाडी

कोल्हापूर : राधानगरी विधानसभा मतदार संघातून शिंदेसेनेचे आमदार प्रकाश आबिटकर हे नवव्या फेरीअखेर १०५३३ मतांनी आघाडीवर आहेत. एकूण कल पाहता आमदार आबिटकर यांची ही निर्णायक आघाडी मानली जाते.या मतदार संघातून उध्दवसेनेचे माजी आमदार के.पी.पाटील यांनी आबिटकर यांना तगडे आव्हान दिले. कधी नव्हे ती राधानगरी तालुक्यातील काँग्रेस के.पी.पाटील यांच्या मागे एकवटली होती. झाडून सारे मातब्बर नेते त्यांच्यामागे होते. परंतू आमदार आबिटकर सुरुवातीपासूनच नेते कुणाकडेही असले तरी जनता माझ्यासोबत आहे यावर ठाम होते. मतपेटीतून तसेच चित्र पुढे येताना दिसत आहे. आमदार आबिटकर यांनी केलेली विकासकामे, उत्तम संपर्क, तरुणाईला भावणारे व्यक्तिमत्व, सुखदु:खाला धावून येणारा आमदार अशी त्यांची प्रतिमा होती, तिलाच जनतेने मतपेटीतून बळ दिल्याचे दिसत आहे. के.पी.पाटील यांना उशीराने जाहीर झालेली उमेदवारी, त्यामुळे लोकांपर्यंत पोहोचण्यात आलेल्या अडचणी, शिवाय तुम्ही बिद्री कारखाना चांगला चालवताय तर त्याकडेच लक्ष द्या असाही मेसेज जनतेने आतापर्यंतच्या निकालावरून दिल्याचे दिसत आहे. या मतदार संघात ए.वाय.पाटील यांनी बंडखोरी केली होती परंतू त्यांचा तसा आबिटकर यांनाही फार फायदा झाल्याचे दिसत नाही. आबिटकर स्वत:च्या ताकदीवरच निकालात पुढे सरकल्याचे दिसत आहे.