गिजवणे ‘आरक्षित’; उमेदवार ‘सर्वसाधारण’

बहुरंगी लढतीची शक्यता : राष्ट्रवादी काँग्रेसला आव्हान देण्यासाठी विरोधकांची व्यूहरचना

राम मगदूम ल्ल गडहिंग्लज
गिजवणे गट ओबीसी पुरुषासाठी आरक्षित आहे. मात्र, सर्वसाधारण प्रवर्गातील संजय बटकडली, सतीश पाटील व दिग्विजय कुराडे यांनी ओबीसी दाखले काढले आहेत. राष्ट्रवादीकडून सतीश पाटील हे एकमेव प्रबळ दावेदार असून, त्यांच्याविरोधात भाजपतर्फे लढण्यास विश्वनाथ स्वामी, बटकडली व कुराडे हे तिघेही इच्छुक आहेत.
त्यामुळे या ठिकाणी बहुरंगी लढतीची शक्यता आहे.
१९५२ ते ६२ अखेर काँगे्रसचे ज्येष्ठ नेते नागाप्पाण्णा बटकडली हे जिल्हा लोकल बोर्डाचे सदस्य होते. महाराष्ट्र राज्याच्या स्थापनेनंतर जिल्हा परिषदा अस्तित्वात आल्या. तेव्हापासून नव्वदअखेर तेच कडगाव जिल्हा परिषद मतदारसंघाचे प्रतिनिधित्व करत होते. त्यांचे गाव कडगाव आणि त्यांचा मतदारसंघही कडगाव, यामुळे त्यांच्या नावानेच हा मतदारसंघ ओळखला जायचा. तब्बल चार दशके त्यांनी जिल्हा परिषदेवर आपल्या कर्तृत्वाचा ठसा उमटविला.
१९९२ मध्ये हा मतदारसंघ महिलांसाठी राखीव झाला. त्यावेळी सुलोचना सुरेश बटकडली, क्रांतिदेवी किसनराव कुराडे, कृष्णाबाई चौगुले व सुमन रायकर यांनी उमेदवारी दाखल केली. मात्र, नागाप्पाण्णांनीच पुढाकार घेऊन निवडणूक बिनविरोध केली आणि क्रांतिदेवी कुराडे यांना संधी मिळाली.
१९९७ मध्ये काँगे्रसने अ‍ॅड. सुरेश कुराडे यांना उमेदवारी दिली. त्यांच्याविरोधात सुरेश बटकडली व अ‍ॅड. विकास पाटील यांनी बंडखोरी केली, तर जनता दलातर्फे शिवाजीराव मगदूम यांनी निवडणूक लढविली. त्यावेळी पाटील यांना हत्तरकींची, तर बटकडली यांना शहापूरकरांची साथ होती. त्यात बटकडली यांनी बाजी मारली होती.
२००२ च्या निवडणुकीत अ‍ॅड. श्रीपतराव शिंदे व डॉ. प्रकाश शहापूरकरांची युती झाली. त्यावेळी बटकडली यांनी शहापूरकर गटातर्फे निवडणूक लढविली. त्यांच्या विरोधात राष्ट्रवादीतर्फे अशोक मोहिते, तर काँगे्रसतर्फे अ‍ॅड. सुरेश कुराडे रिंगणात होते. त्यावेळीही बटकडली यांनीच बाजी मारली.
२००७ मध्ये जनता दल व जनसुराज्यची आघाडी होती. त्यावेळी बटकडलींनी जनसुराज्यतर्फे निवडणूक लढविली. शहापूरकर गटाच्या गणपतराव डोंगरेंना काँगे्रस-राष्ट्रवादी आघाडीची उमेदवारी मिळाली. त्यांच्याविरोधात काँगे्रसच्या प्रा. किसनराव कुराडे व सतीश पाटील यांनी बंडखोरी केली. मात्र, अवघ्या साडेतीनशे मतांनी पाटील यांचा डोंगरेंकडून पराभव झाला होता.
२०१२ मध्ये काँगे्रसने क्रांतिदेवी कुराडे यांना उमेदवारी दिली. त्यांच्याविरोधात राष्ट्रवादीच्या शैलजा सतीश पाटील होत्या. शहापूरकर गटही त्यावेळी राष्ट्रवादीसोबत होता. त्यात तब्बल २९०० मतांनी शैलजा पाटील विजयी झाल्या. या ठिकाणी शहापूरकर गटाची ताकद निर्णायक असून, त्यांच्या भूमिकेला विशेष महत्त्व राहणार आहे.
मुश्रीफांच्या प्रतिष्ठेचा मतदारसंघ
गडहिंग्लज तालुक्यातील हा गट कागल विधानसभा मतदारसंघात समाविष्ट आहे. गडहिंग्लज साखर कारखान्याचे संचालक सतीश पाटील हे आमदार मुश्रीफ यांचे निकटवर्ती व प्रमुख कार्यकर्ते आहेत. त्यांच्या पत्नी शैलजा पाटील यांच्या रूपाने गेल्यावेळी प्रथमच या मतदारसंघात राष्ट्रवादीचा उमेदवार निवडून आला. त्यामुळे हा मतदारसंघ आपल्या ताब्यात ठेवण्यासाठी मुश्रीफ यांनी जोरदार मोर्चेबांधणी केली असून, राष्ट्रवादीकडून ही जागा काबीज करण्यासाठी विरोधकांनीही व्यूहरचना चालविली आहे. त्यामुळे मुश्रीफांच्यादृष्टीने हा मतदारसंघ प्रतिष्ठेचा असणार आहे.