भाच्याच्या मृत्यूप्रकरणी मामावर गुन्हा

निलंगा (जि. लातूर) : निलंगा तालुक्यातील सिंदखेड येथील एकजण स्वत:च्या आईसोबत शिवीगाळ करत होता. तेव्हा १९ वर्षीय भाचा मामाला शिवीगाळ करु नका, अशी विनवणी करु लागला. तेव्हा मामाने भाच्याच्या शर्टाच्या गच्चीला धरुन ढकलून दिले. त्यात भाच्याचे डोके पायरीच्या दगडावर आपटल्याने त्याचा मृत्यू झाला. ही घटना २९ जून रात्री रोजी घडली. याप्रकरणी निलंगा पोलीस ठाण्यात मामावर गुन्हा दाखल करण्यात आला आहे.

प्रथमेश प्रकाश बोलसुरे (वय १९ वर्षे, रा. सिंदखेड, ता. निलंगा) असे मयत भाच्याचे नाव आहे. पोलिसांनी सांगितले, सिंदखेड येथील बालाजी बब्रुवान जाधव हा २९ जून रोजी रात्री १०.३०च्या सुमारास आईसोबत शिवीगाळ करत होता. तेव्हा भाचा प्रथमेश बोलसुरे याने पाहिले आणि तो मामाला आजीला शिवीगाळ करू नका, अशी विनवणी करु लागला. तेव्हा बालाजी जाधव याने प्रथमेशच्या शर्टाच्या गच्चीला धरून ढकलून दिले. त्यात त्याचे डोके पायरीच्या दगडावर आपटल्याने गंभीर जखमी होऊन मृत्यू झाला.

याप्रकरणी मयत मुलाची आई सुरेखा बोलसुरे यांच्या फिर्यादीवरून आरोपी बालाजी जाधव याच्याविरुद्ध कलम ३०४, ३२३, ५०४ भादंविप्रमाणे निलंगा पोलीस ठाण्यात गुन्हा दाखल करण्यात आला आहे.