काँग्रेसला मोठा धक्का, माजी मुख्यमंत्री पृथ्वीराज चव्हाण यांचा पराभव, कराड दक्षिणेत अतुलपर्व!

Karad South Vidhan Sabha Election Result 2024 Live : सातारा जिल्ह्यातील कराड दक्षिण विधानसभा मतदारसंघात भाजपाचे उमेदवार डॉ. अतुल भोसले जायंट किलर ठरले आहेत.

Karad South Assembly-Vidhan Sabha Election 2024 Result Live   : कराड : महाराष्ट्रात विधानसभेच्या निवडणुकाचे निकाल सुरु झाले आहेत. या निवडणुकीत आतापर्यंत अनेक धक्कादायक निकाल हाती आले आहेत.या निकालात महायुतीने स्पष्ट बहुमताच्या दिशेने चालली आहे. या विधानसभेच्या निकालात महायुतीला चांगली आघाडी मिळालेली आहे. याच पार्श्वभूमीवर काँग्रेस नेते आणि माजी मुख्यमंत्री पृथ्वीराज चव्हाण यांना पराभवाला सामोरे जावे लागले आहे.

सातारा जिल्ह्यातील कराड दक्षिण विधानसभा मतदारसंघात भाजपाचे उमेदवार डॉ. अतुल भोसले जायंट किलर ठरले आहेत. त्यांनी तब्बल ३८ हजार ५४५ मतांनी पृथ्वीराज चव्हाण यांचा पराभव केला आहे. या पराभवामुळे काँग्रेसच्या आजवरच्या एकहाती वर्चस्वाला अक्षरशः सुरूंग लागला असून भाजपा कार्यकर्त्यांकडून जल्लोष केला जात आहे.

(Maharashtra Election Results 2024)

मागील दोन विधानसभा निवडणुकीत माजी मुख्यमंत्री आमदार पृथ्वीराज चव्हाण यांनी कराड दक्षिण विधानसभा मतदारसंघाचे विधानसभेत प्रतिनिधीत्व केले होते. मात्र, यंदाच्या निवडणुकीत कराड दक्षिण मतदार संघातून धक्कादायक निकाल आलेला आहे. भाजपच्या अतुल भोसले यांनी पृथ्वीराज चव्हाण यांचा पराभव केला आहे. अतुल भोसले यांना एकूण १ लाख ३७ हजार २८९ मत मिळाली. तर, पृथ्वीराज चव्हाण यांना एकूण ९८ हजार ७४४ मतं पडली आहेत.

दरम्यान, कराड दक्षिण विधानसभा मतदारसंघात काँग्रेसचा नेहमीच प्रभाव राहिला आहे. काँग्रेसने याठिकाणी सात वेळा विजय मिळवला आहे. मात्र, यावेळी महाराष्ट्राचे माजी मुख्यमंत्री असलेल्या पृथ्वीराज चव्हाण यांचा अशा प्रकारे धक्कादायक पराभव झाल्याने काँग्रेसला मोठा धक्का बसल्याचे म्हटले जात आहे.