मोदी, तुम्हाला देश कधीही माफ करणार नाही, राज ठाकरे यांची टीका

आकस, सातत्याने खोटे बोलणे, सार्वजनिक जीवनातील कोणत्याही संकेतांचे भान नसणे; या तीन गोष्टींसाठी पंतप्रधान नरेंद्र मोदींची कारकिर्द ओळखली जात होती. आता त्यात विधीशून्यतेची भर पडली आहे.

मुंबई  - आकस, सातत्याने खोटे बोलणे, सार्वजनिक जीवनातील कोणत्याही संकेतांचे भान नसणे; या तीन गोष्टींसाठी पंतप्रधान नरेंद्र मोदींची कारकिर्द ओळखली जात होती. आता त्यात विधीशून्यतेची भर पडली आहे. राजीव गांधी यांच्याबद्दलच्या विधानासाठी मोदी, तुम्हाला देश कधीही माफ करणार नाही, अशी टीका मनसे अध्यक्ष राज ठाकरे यांनी ट्विटरवरून मोदी यांच्यावर केली आहे.

नरेंद्र मोदी यांनी प्रतापगड आणि बस्ती येथील जाहीरसभांमध्ये काँग्रेसचे अध्यक्ष राहुल गांधी यांचे वडील आणि माजी पंतप्रधान राजीव गांधी यांच्यावर टीका केली. ‘तुमच्या वडिलांची प्रतिमा तुमच्या ‘राजदरबाऱ्यांनी’ मिस्टर क्लीन अशी रंगवली. पण त्यांच्या आयुष्याची अखेर ‘भ्रष्टाचारी नंबर १’ च्या रुपात झाली. नामदार, हा अहंकार तुम्हाला खाऊन टाकेल. हा देश चुका माफ करतो. पण फसवेगिरी कधीही माफ करत नाही, असे मोदी म्हणाले होते.

दरम्यान, राहुल गांधी यांनी देखील ट्विटरवर प्रतिक्रिया दिली. ‘लढाई संपलेली आहे. तुमचे कर्म तुमची वाट पाहतंय,’ असे ट्विट राहुल यांनी यावर केले होते.