१३८ अनधिकृत इमारतींवर कारवाई

‘के पश्चिम’ विभागात वर्सोवा परिसरातील जिल्हाधिकाऱ्यांच्या अखत्यारीत असणाऱ्या जमिनी आणि सीआरझेड क्षेत्रातील १३८ अतिक्रमणे

मुंबई : ‘के पश्चिम’ विभागात वर्सोवा परिसरातील जिल्हाधिकाऱ्यांच्या अखत्यारीत असणाऱ्या जमिनी आणि सीआरझेड क्षेत्रातील १३८ अतिक्रमणे तोडण्यात आली. पोलीस व जिल्हाधिकारी कार्यालयाच्या सहकार्याने महापालिकेच्या पथकाने आतापर्यंत १३८ अतिक्रमणे तोडली आहेत, असे साहाय्यक आयुक्त प्रशांत गायकवाड यांनी सांगितले.
वर्सोवा परिसरातील सरदार वल्लभभाई पटेल नगरजवळ असणाऱ्या सिद्धार्थ नगर परिसरात जिल्हाधिकारी कार्यालयाच्या अखत्यारीत असणाऱ्या सागरी नियमन क्षेत्रातील जमिनीवर मोठ्या प्रमाणात अतिक्रमणे होती. ही अतिक्रमणे हटविण्याबाबत जिल्हाधिकारी कार्यालयाच्या विनंतीनुसार महापालिकेद्वारे कारवाई करण्यात आली आहे. ही कारवाई करण्यासाठी पोलीस दलाचे ३० पोलीस कर्मचारी, महापालिकेचे २२ कामगार, कर्मचारी, अधिकारी आणि जिल्हाधिकारी कार्यालयाचे ७ कर्मचारी, अधिकारी उपस्थित होते. (प्रतिनिधी)