वसई-विरारमध्ये १७ नवे रुग्ण

वसई : वसई-विरार महापालिका हद्दीत सोमवारी दिवसभरात कोरोनाचे १७ रुग्ण नव्याने आढळून आले असून ३० रुग्ण रुग्णालयातून मुक्त झाले आहेत. शहरात दिवसभरात एकाही रुग्णाचा मृत्यू झाला नसल्याने दिलासा मिळाला आहे. शहरात अजूनही ३३३ रुग्ण विविध रुग्णालयांत उपचार घेत आहेत.

ज्वेलर्स दुकानातून दागिने चोरीला

नालासोपारा : नालासोपाऱ्याच्या आचोळे रोडवरील सुयोग अपार्टमेंटमधील गगण गोल्ड ज्वेलर्समध्ये २४ डिसेंबरला रात्री दागिन्यांची चोरी झाली आहे. एक महिला दुकानात येऊन चांदीची चेन पाहिजे, असे सांगून दिशाभूल करत हातचलाखीने एक सोन्याची अंगठी व दोन चांदीच्या चेन असा ४४ हजारांचा माल तिने चोरून नेला आहे. दुकानातील सीसीटीव्ही फुटेज तपासून रविवारी दुकान मालक मुकेश मोहनलाल जैन (४३) यांनी तक्रार देऊन तुळिंज पोलीस ठाण्यात गुन्हा दाखल केला आहे.

दोन अल्पवयीन मुलींचे अपहरण

नालासोपारा : नालासोपारा पूर्वेकडील शिर्डीनगरच्या इमारतीमध्ये राहणारी १५ वर्षांची अल्पवयीन मुलगी व तिची १४ वर्षांची मैत्रीण शनिवारी संध्याकाळी वडापाव आणण्यासाठी गेल्या होत्या. त्या घरी परतल्या नाहीत, म्हणून घरच्यांनी आजूबाजूला शोध घेतला, पण त्या सापडल्या नाहीत, म्हणून शेवटी रविवारी तुळिंज पोलीस ठाण्यात तक्रार देऊन अपहरणाचा गुन्हा दाखल केला आहे.