अल्पवयीन मुलीचे अपहरण करणाऱ्या आरोपीस अहमदनगर येथून अटक

लोकमत न्यूज नेटवर्क

ठाणे : एका १४ वर्षीय मुलीचे अपहरण करून तिला पळवून नेणाऱ्या सागर मगर (२५, रा. दिवा, ठाणे) याला अहमदनगर येथून अटक करण्यात ठाणे गुन्हे अन्वेषण विभागाला यश आले आहे. त्याला गुरुवारी मुंब्रा पोलिसांच्या ताब्यात दिल्याची माहिती सूत्रांनी दिली.

मुंब्रा भागातील या अल्पवयीन मुलीचे अपहरण झाल्याचा गुन्हा २९ नोव्हेंबर २०२० रोजी मुंब्रा पोलीस ठाण्यात तिच्या पालकांनी दाखल केला होता. या प्रकरणी ठाणे गुन्हे अन्वेषण विभागाच्या युनिट १ मार्फतही समांतर तपास करण्यात येता. दरम्यान, यातील आरोपी सागर मगर यानेच या अल्पवयीन मुलीला फूस लावून पळवून नेले असून, तो अहमदनगर जिल्ह्यातील शेवगाव येथे वास्तव्याला असल्याची माहिती युनिट १ चे पोलीस नाईक अमोल देसाई यांना मिळाली होती. या माहितीच्या आधारे वरिष्ठ पोलीस निरीक्षक नितीन ठाकरे यांच्या मार्गदर्शनाखाली पोलीस निरीक्षक कृष्णा कोकणी, सहायक पोलीस निरीक्षक प्रफुल्ल जाधव, पोलीस हवालदार आनंदा भिलारे, पोलीस नाईक अमोल देसाई, माधुरी जाधव आणि राहुल पवार आदींच्या पथकाने २० जानेवारी रोजी अहमदनगर येथे जाऊन सर्व बाबींची पडताळणी केली. अथक परिश्रमाअंती सागर हा शेवगाव येथील कुणाल हॉटेल येथे असल्याची माहिती मिळाली. या माहितीच्या आधारे शेवगाव पोलिसांच्या मदतीने कुणाल हॉटेल येथे छापा मारून या अल्पवयीन मुलीची सुटका करून सागर याला या पथकाने ताब्यात घेतले. त्याला आता मुंब्रा पोलिसांच्या ताब्यात देण्यात आले आहे.