एनसीबीची कारवाई; ड्रग्ज तस्कर बटाटा पिता-पुत्रासोबत संबंध असल्याचा संशय
लोकमत न्यूज नेटवर्क
मुंबई : बॉलिवूड अभिनेता एजाज खानचा ड्रग्ज तस्कराशी संबंध असल्याच्या आरोपावरून अमली पदार्थविरोधी नियंत्रण कक्षाने (एनसीबी) मंगळवारी रात्री उशिरा अभिनेता एजाज खान याला अटक केली. ड्रग्ज माफिया फारूख बटाटा व त्याचा मुलगा शादाब बटाटा याच्याशी अमली पदार्थ विक्री व सेवन व्यवहारात त्याचा सहभाग असल्याचे स्पष्ट झाल्याने ही कारवाई करण्यात आल्याचे सांगण्यात आले.
एजाज खान हा मंगळवारी राजस्थानहून मुंबईला परतल्यानंतर एनसीबीने विमानतळावर त्याला ताब्यात घेतले. त्याच्या गाडीतून दक्षिण मुंबईतील फोर्ट येथील कार्यालयात आणले होते. येथे सुमारे ८ तास चौकशी केल्यानंतर त्याला रात्री उशिरा अटक केली. त्याच्याकडील तपासातून ड्रग्जच्या बॉलिवूड कनेक्शनबद्दल आणखी महत्त्वपूर्ण माहिती समोर येण्याची शक्यता वर्तविण्यात येत आहे.
माफिया फारुखचा मुलगा शादाबला गेल्या आठवड्यात एनसीबीने अटक केली. त्याच्याकडून सुमारे २ कोटी रुपयांचे ड्रग्ज जप्त केले होते. शादाबच्या चौकशीतून अमली पदार्थ सेवनामध्ये गुंतलेल्या काही सेलिब्रिटींची नावे समोर आली आहेत. त्यामध्ये अभिनेता एजाज खानबद्दल तपशीलवार माहिती मिळाली. त्यामुळे पथकाने त्याच्याकडे मोर्चा वळविला होता.
मंगळवारी तो राजस्थानवरून मुंबईत आला तेव्हा त्याला एनसीबीने नोटीस बजावली. त्यापूर्वी एनसीबीने त्याच्या अंधेरीतील लोखंडवाला या ठिकाणी छापा टाकला होता. शादाब बटाटा ड्रग्जच्या धंद्यात खूप आधीपासून आहे. मुंबईतील अनेक बॉलिवूड सेलिब्रिटींना तो ड्रग्ज पुरवण्याचे काम करतो. त्याच्याकडील अनेक महागड्या गाड्या ताब्यात घेण्यात आल्या आहेत.
* कोण आहे एजाज खान?
एजाझ खानने ‘रक्तचरित्र’, ‘अल्लाह के बंदे’ यांसारख्या बॉलिवूडपटांमध्ये काम केले आहे. ‘रहे तेरा आशीर्वाद’, ‘कहानी हमारे महाभारत की’, ‘करम अपना अपना’ यांसारख्या मालिकांमध्येही अभिनय केला आहे. बिग बॉस-७च्या सिझनमुळे ताे वादाच्या भोवऱ्यात सापडला होता.
..................