ड्रग्ज प्रकरणात अभिनेता गौरव दीक्षितला अटक

मुंबई : नार्कोटिक्स कंट्रोल ब्युरोने ड्रग्ज प्रकरणी अभिनेता आणि टीव्ही स्टार गौरव दीक्षितला शुक्रवारी अटक केली आहे. गौरवच्या घरातून एमडी आणि चरसचा साठा जप्त करण्यात आला होता.

अभिनेता आणि बिग बॉसचा माजी स्पर्धक असलेल्या एजाझ खानच्या अटकेनंतर अंधेरीतील लोखंडवाला संकुलात राहणाऱ्या टीव्ही स्टार गौरव दीक्षितचे नाव समोर आले. माहिती मिळताच नार्कोटिक्स कंट्रोल ब्युरोने गौरवच्या घरावर छापा टाकला. गौरवच्या घरातून एप्रिल महिन्यात केलेल्या कारवाईत एमडी, चरसचा साठा जप्त केला होता. तसेच ड्रग्ज पॅकिंगचे साहित्य मोठ्या प्रमाणावर जप्त करण्यात आले. टीव्ही स्टार गौरव दीक्षित घरात बसून ड्रग्ज पॅकेजिंगचा व्यवसाय करत होता, अशीही माहिती समोर आली.

गौरव आणि त्याची मैत्रीण नार्कोटिक्स कंट्रोल ब्युरोचे पथक घरी येण्याआधीच पळून गेले होते. तेव्हापासून एनसीबी त्याच्या शोधात होती. गौरवने मरुधर एक्स्प्रेस आणि डायरी ऑफ अ बटरफ्लाय या सिनेमात काम केले आहे. शुक्रवारी त्याला एनसीबीने अटक केली. या प्रकरणी त्याच्याकडे अधिक तपास सुरू आहे.