मुंबईः बॉलिवूडमध्ये आपल्या सहजसुंदर अभिनयानं चित्रपट चाहत्यांच्या मनात आपलं एक वेगळं स्थान निर्माण करणाऱ्या करीना कपूरला 'लोकमत महाराष्ट्रीयन ऑफ द इयर २०१८ पुरस्कार सोहळ्यात 'पॉवर आयकॉन' पुरस्कारानं सन्मानित करण्यात आलं. ...... यांच्या हस्ते करीनाचा सन्मान करण्यात आला.
चित्रपटांमधील वेगळ्या धाटणीच्या भूमिका अतिशय सक्षमपणे साकारणाऱ्या करीना कपूरचा सन्मान 'लोकमत'कडून करण्यात आला. चित्रपट विनोदी असो वा गंभीर, करिनानं तिच्या सुंदर अभिनयानं सर्वच भूमिकांना उत्तम न्याय दिला. 'रेफ्युजी'मधून २००१ मध्ये बॉलिवूडमध्ये पदार्पण करणारी करीना आजही तिच्या उत्तम अभिनयामुळे आघाडीची अभिनेत्री आहे. रेफ्युजीसाठी सर्वोत्कृष्ट पदार्पणाचा 'फिल्मफेअर पुरस्कार' पटकावणाऱ्या करीनाच्या अभिनयाची जादू आजही कायम आहे. आपला फिटनेस जपत, अविरतपणे कष्ट करत करीनाने मिळवलेलं यश तरुणांसाठी कायमच कौतुकाचा विषय ठरलंय. त्यामुळेच तिला लोकमतच्या पुरस्कार सोहळ्यात 'पॉवर आयकॉन' पुरस्कारानं सन्मान करण्यात आला.
रेफ्युजी ते उडता पंजाब असा करीनाचा १६ वर्षांचा प्रवास थक्क करणारा आहे. बॉलिवूडमध्ये भूमिका लिहिताना नायकांना दिलं जाणारं प्राधान्य, इतर अभिनेत्रींकडून मिळणारी स्पर्धा या सगळ्याचा यशस्वी सामना करत करिनानं तिचं वेगळं स्थान निर्माण केलं. सैफ अली खानसोबतचं लग्न आणि तैमूरच्या जन्मानंतर करीना कपूरनं थोडा ब्रेक घेतला. मात्र लवकरच 'वीरे दी वेडिंग' या चित्रपटातून करीना बॉलिवूडमध्ये पुनरागमन करतेय. कुटुंब आणि करिअर अशी तारेवरची कसरत करत बॉलिवूडमधील स्थान आणखी भक्कम करण्याचा करीनाचा प्रयत्न आहे.