वसई : प्रचार संपण्यास एक दिवस बाकी असतानाच शिवसेनेने युवासेनाप्रमुख आदित्य ठाकरे यांचा रोड-शो सायंकाळी ६ ते रात्री ९ या तीन तासांच्या काळात आयोजिला होता. त्याला चांगला प्रतिसाद लाभला. ओपन जीपमधून आदित्य यांनी प्रचार यंत्रणाप्रमुख व पर्यावरण मंत्री रामदास कदम तसेच पालघर जिल्हा संपर्क प्रमुख अनंत तरे आदींसह या रोड-शोला नालासोपाऱ्यातून प्रारंभ केला. व त्याचा समारोप वसई येथे झाला. असाच रोड-शो अनंत तरे आणि रामदास कदम हे शुक्रवारी सकाळी १० ते रात्री १ या काळात घेणार आहेत. रामदास कदम यांनी आघाडीच्या नेत्यांवर प्रखर टीका केली असता. सेनेच्या नेत्यांना आणि मंत्र्यांना वसई-विरारमध्ये फिरकू देणार नाही, सभा घेऊ देणार नाही असे आघाडीच्या नेत्यांनी जाहीर केले होते. परंतु कदम व अन्य नेत्यांची वसईतील सभा व आदित्य ठाकरे यांचा शो व्यवस्थित पार पडला. यामुळे निवडणूक आणि पोलीस यंत्रणेने सुटकेचा निश्वास सोडला आहे.(प्रतिनिधी)
आदित्य ठाकरेंंचा झाला रोड-शो
By लोकमत न्यूज नेटवर्क | Published: June 11, 2015 11:09 PM