‘अजिंक्यतारा’च्या तारखा लवकरच

मॉरिशस येथे आयोजित करण्यात आलेला अजिंक्यतारा पुरस्कार सोहळा लवकरच होणार आहे. या सोहळ्याच्या नवीन तारखा लवकरच जाहीर करण्यात येतील

मुंबई : मॉरिशस येथे आयोजित करण्यात आलेला अजिंक्यतारा पुरस्कार सोहळा लवकरच होणार आहे. या सोहळ्याच्या नवीन तारखा लवकरच जाहीर करण्यात येतील, अशी माहिती या सोहळ्याचे आयोजक सिनेविस्टा एंटरटेन्मेंटने रात्री उशिरा काढलेल्या प्रसिद्धिपत्रकात दिली आहे.२१ ते २३ आॅगस्ट या कालावधीत हा सोहळा पार पडणार होता. मात्र कोणतीही पूर्वसूचना न देता काल अचानक हा सोहळा रद्द करण्यात आला होता. काही तांत्रिक अडचणींमुळे हा पुरस्कार सोहळा रद्द करण्यात आल्याचे त्यांनी पत्रकात स्पष्ट केले आहे. मराठी चित्रपटांच्या गौरवार्थ आयोजित हा पुरस्कार सोहळा अचानक रद्द झाल्याने बुधवारी मॉरिशससाठी उड्डाण करण्याच्या तयारीत असलेल्या काही कलावंतांवर माघारी परतण्याची वेळ आली होती. हा सोहळा रद्द करण्यामागचे कारण गुलदस्त्यात असताना आज आयोजकांनी तांत्रिक अडचणीचे कारण दिले असून, या कारणामुळेच हा सोहळा आयत्यावेळी रद्द करण्यात आल्याचे त्यांनी म्हटले आहे. तसेच पुढे ढकलण्यात आलेल्या या सोहळ्याच्या आयोजनात काही उणीव राहू नये यासाठी अधिक वेळ हवा असल्याचेही या पत्रकात स्पष्ट करण्यात आले आहे. (प्रतिनिधी)