मुंबई : आगामी महापालिका निवडणुकांच्या पार्श्वभूमीवर शिवसेना-भाजपकडून आशीर्वाद यात्रेच्या माध्यमातून रविवारी जोरदार शक्तिप्रदर्शन करण्यात आले. खास अयोध्येतून आणलेला धनुष्यबाण उंचावत भाजप मुंबई अध्यक्ष आमदार आशिष शेलार यांनी घाटकोपरहून या यात्रेला सुरुवात केली. सायंकाळी मुख्यमंत्री एकनाथ शिंदे यांनी वरळीत या यात्रेत सहभागी हाेत मुंबईकरांना अभिवादन केले.
आशीर्वाद यात्रेला घाटकोपर पश्चिम अमृतनगरमधील छत्रपती शिवाजी महाराज चौकातून जोरदार सुरुवात झाली. सहा लोकसभा मतदारसंघातून ही यात्रा निघणार आहे. पहिल्या टप्प्यात १० हजारांहून अधिक सहभागी बाइकस्वारांसह मुलुंड बाळराजेश्वर मंदिरापर्यंत यात्रा काढण्यात आली. आमदार राम कदम, मिहिर कोटेचा, पराग शहा हेही या यात्रेत सहभागी झाले. दुसऱ्या टप्प्यात वरळी ते मुंबादेवी मंदिरपर्यंत ही आशीर्वाद यात्रा सायंकाळच्या सुमारास निघाली.
या यात्रेत स्वत: मुख्यमंत्री एकनाथ शिंदे सहभागी झाले होते. यावेळी आशिष शेलार यांच्यासह महापालिकेचे माजी स्थायी समिती अध्यक्ष यशवंत जाधवही सहभागी झाले. वरळी, प्रभादेवी, चिंचपोकळी, मुंबई सेंट्रल, गिरगाव, मुंबादेवी मंदिर अशी ही आशीर्वाद यात्रा काढण्यात आली. पुढील यात्रा ९ व ११ मार्च रोजी काढण्यात येईल.