बँका सलग चार दिवस बंद

नागरिकांच्या हातात बँकांचे व्यवहार करण्यासाठी फक्त दोन दिवस आहेत.

मुंबई : या महिन्यांच्या शेवटच्या शनिवारपासून ते मे महिन्याच्या मंगळवारपर्यंत सलग सार्वजनिक सुट्ट्या असल्याने बँका बंद राहणार आहेत. एप्रिलच्या २८ तारखेला चौथा शनिवार, २९ एप्रिलला रविवार, ३० एप्रिलला बुद्ध पौर्णिमा आणि १ मे ला महाराष्ट्र दिन, कामगार दिवस असल्याने, सलग चार दिवस बँकांचे काम ठप्प राहील. यामुळे चेक वटवणे, बँकेत पैसे टाकणे/काढणे शक्य होणार नाही. नागरिकांच्या हातात बँकांचे व्यवहार करण्यासाठी फक्त दोन दिवस आहेत. बँक बंद असलेल्या चार दिवसांत आर्थिक देवाण-घेवाण करण्यासाठी ग्राहकांना एटीएमचा पर्याय उपलब्ध आहे. २ मेपासून पुन्हा बँका पूर्ववत सुरू होतील.