बीडीडी चाळ पुनर्विकास प्रकल्प : नमुना निवासी पुनर्विकास सदनिकेचे उद्घाटन

महाराष्ट्र शासनाच्या इच्छाशक्तीमुळे  बी. डी. डी. चाळींचा पुनर्विकास प्रकल्प मार्गी लागला असून  या चाळीतील रहिवाशी ही मुंबईची खरी ओळख असून येथील रहिवाशांनी या पुनर्विकसीत सदनिका भविष्यात विक्री करू नये, असे आवाहन राज्याचे गृहनिर्माण मंत्री प्रकाश मेहता यांनी केले.

मुंबई  : महाराष्ट्र शासनाच्या इच्छाशक्तीमुळे  बी. डी. डी. चाळींचा पुनर्विकास प्रकल्प मार्गी लागला असून  या चाळीतील रहिवाशी ही मुंबईची खरी ओळख असून येथील रहिवाशांनी या पुनर्विकसीत सदनिका भविष्यात विक्री करू नये, असे आवाहन राज्याचे गृहनिर्माण मंत्री प्रकाश मेहता यांनी केले.महाराष्ट्र शासनाचा अत्यंत महत्वाकांक्षी बी. डी. डी. चाळींच्या पुनर्विकास प्रकल्पाअंतर्गत ना. म. जोशी मार्ग - परळ येथे  उभारण्यात आलेल्या नमुना निवासी पुनर्विकास सदनिकांच्या उद्घाटनप्रसंगी मेहता बोलत होते. या कार्यक्रमाला गृहनिर्माण राज्यमंत्री रवींद्र वायकर, खासदार अरविंद सावंत, आमदार कालिदास कोळंबकर, आमदार सुनील शिंदे, म्हाडाचे उपाध्यक्ष मिलिंद म्हैसकर, मुंबई मंडळाचे सहमुख्य अधिकारी सुभाष लाखे, नगरसेविका स्नेहल आंबेकर, सुनील राणे  आदी उपस्थित होते. रवींद्र वायकर म्हणाले की, मुंबईतील मराठी माणूस मुंबईत ठेवण्याचे काम या प्रकल्पाच्या माध्यमातून होत आहे. घराच्या रूपाने देव पाहण्यासाठी आज चाळीतील रहिवाशांची गर्दी होत असल्याचे बघून मनापासून आनंद होत आहे.महाराष्ट्र गृहनिर्माण व क्षेत्रविकास प्राधिकरणाच्या (म्हाडा) माध्यमातून राबविण्यात येत असलेल्या या प्रकल्पाचे भूमिपूजन मुख्यमंत्री देवेंद्र फडणवीस यांच्या हस्ते २२ एप्रिल २०१७ रोजी करण्यात आले. या प्रकल्पाचा आराखडा व नियोजन लक्षात घेता हा देशातील मोठ्या   नागरी पुनरुत्थान प्रकल्पांपैकी एक ठरतो. बीडीडी चाळीतील पात्र निवासी भाडेकरूस ५०० चौरस फूट चटई क्षेत्रफळाची निवासी पुनर्विकास सदनिका मालकी तत्वावर मोफत दिली जाणार आहे.नायगाव -दादर व ना. म. जोशी मार्ग - परळ येथील नमुना पुनर्विकास सदनिकेत लिविंग + डायनिंग, किचन, बेडरूम, मास्टर बेडरूम विथ अटॅच टॉयलेट, कॉमन टॉयलेट, पॅसेजचा समावेश आहे. या सदनिकेत व्हिट्रीफाइड टाइल्सचे फ्लोरिंग, किचनमध्ये अँटीस्किड टाइल्सचे फ्लोरिंग, सिंकसहित ग्रॅनाईट किचन ओटा, टॉयलेटमध्ये अँटीस्किड टाइल्सचे फ्लोरिंग, खिडक्यांना अ‍ॅनोडाईड सेक्शन, लिविंग रूम व बेडरूम यांना लाकडी फ्रेमचे आणि टॉयलेटसाठी मार्बलची फ्रेम असलेले दरवाजे यांचा समावेश आहे.नायगाव-दादर येथील बीडीडी चाळ ६.४५ हेक्टरवर  स्थित असून ३२८९ निवासी सदनिका असणा-या या चाळींच्या पुनर्विकास प्रकल्पासाठी मे. लार्सन अँड टुब्रो या बांधकाम एजन्सीची नियुक्ती करण्यात आली आहे. तर ना. म. जोशी मार्ग - परळ येथील  ५.४६  हेक्टर जमिनीवर स्थित बीडीडी चाळीत २५३६ निवासी सदनिका असून या चाळींच्या पुनर्विकास प्रकल्पासाठी मे. शापुरजी अँड पालनजी या बांधकाम एजन्सीची नियुक्ती करण्यात आली आहे. येत्या सात वर्षात  टप्प्याटप्प्यात हा प्रकल्प पूर्ण करण्याचे प्रस्तावित आहे.