माहीममध्ये बेस्ट बसची शाळेच्या बसला धडक

माहीम कॉजवे परिसरात घडलेल्या विचित्र अपघातात शाळेच्या बससह दोन बेस्ट बसेस एकमेकांना धडकल्या.

मुंबई : माहीम कॉजवे परिसरात घडलेल्या विचित्र अपघातात शाळेच्या बससह दोन बेस्ट बसेस एकमेकांना धडकल्या. यात जखमी झालेल्या पादचाऱ्यावर भाभा रुग्णालयात उपचार सुरू आहेत. तर काही विद्यार्थी किरकोळ जखमी झाले आहेत. माहीम पोलीस या प्रकरणी अधिक तपास करत आहेत.
पोलिसांनी दिलेल्या माहितीनुसार, सोमवारी सकाळी सव्वाआठच्या सुमारास माहीम कॉजवे परिसरात हा अपघात घडला. रस्ता ओलांडत असताना एक पादचारी दुचाकीच्या धडकेत जखमी झाला. त्याच दरम्यान या पादचाºयाला वाचविण्याच्या नादात दुचाकीच्या मागे असलेल्या बेस्ट बस चालकाने तत्काळ ब्रेक दाबला. त्याच्या मागे असलेल्या आणखीन एका बेस्ट बससह शाळेची बस एकमेकांना धडकली. यात शाळेच्या बसमधील विद्यार्थी थोड्यात बचावले, तर काही विद्यार्थी किरकोळ जखमी झाले आहेत. त्यांच्यावर प्रथमोपचार करण्यात आले. या प्रकरणी
अद्याप गुन्हा दाखल करण्यात आलेला नाही.