'अनिल देशमुख, नवाब मलिक अन् मग...'; भाजपाचे नेते किरीट सोमय्यांनी लगेच केलं ट्विट!
By ऑनलाइन लोकमत | Published: February 23, 2022 03:57 PM2022-02-23T15:57:15+5:302022-02-23T16:02:16+5:30
नवाब मलिकांना ईडीकडून अटक करण्यात आली आहे.
'अनिल देशमुख, नवाब मलिक अन् मग...'; भाजपाचे नेते किरीट सोमय्यांनी लगेच केलं ट्विट!
Next मुंबई- तब्बल आठ तासांच्या चौकशीनंतर नवाब मलिकांना ईडीकडून अटक करण्यात आली आहे. त्यांच्या या अटकेनंतर आता राष्ट्रवादी काँग्रेसचे कार्यकर्ते आक्रमक झाले असून त्यांनी ईडीच्या कार्यालयाबाहेर गर्दी केली आहे. राष्ट्रवादीच्या कार्यकर्त्यांकडून ईडीविरोधात जोरदार घोषणाबाजी करण्यात येत असून त्या ठिकाणी मोठा फौजफाटा तैनात करण्यात आला आहे.
नवाब मलिक हे तब्बल आठ तासांच्या चौकशीनंतर ईडीच्या कार्यालयाबाहेर आले. त्यावेळी त्यांनी माध्यमांना व्हिक्टरी साईन दाखवली. लडेंगे आणि जितेंगे डरेंगे नही, असं नवाब मलिक यांनी माध्यमांना सांगितलं आहे. तसेच अटक केली आहे, पण घाबरणार नाही. आम्ही लढू आणि जिंकू, असं नवाब मलिक यांनी म्हटलं. नवाब मलिक यांना आता जे.जे. रुग्णालयात अर्धा तास मेडिकल होईल. त्यानंतर न्यायालयात सुनावणी होईल, अशी माहिती आहे.
"Have been arrested, but won't be scared. We will fight and win," said NCP leader Nawab Malik after being arrested by ED in connection with Dawood Ibrahim money laundering case. pic.twitter.com/LYDdTGoOiK
— ANI (@ANI) February 23, 2022
नवाब मलिक यांना अटक झाल्यानंतर भाजपाचे नेते किरीट सोमय्या यांनी लगेच ट्विट केलं आहे. त्यामध्ये किरीट सोमय्या म्हणाले की, अनिल देशमुख यांच्यानंतर आता नवाब मलिक आणि त्यानंतर शिवसेनेचे नेते अनिल परब असं, म्हणत मुख्यमंत्री उद्धव ठाकरेंच्या सरकारमधील सर्व घोटाळेबाजांना हिशोब द्यावा लागेल, असं किरीट सोमय्या यांनी म्हटलं आहे.
Anil Deshmukh ke bad Nawab Malik & than Anil Parab.
— Kirit Somaiya (@KiritSomaiya) February 23, 2022
Uddhav Thackeray Sarkar ke sabhi Ghotalebaj ko Hisab Dena Padega @BJP4India@BJP4Maharashtra
दरम्यान राष्ट्रवादी काँग्रेसचे नेते नवाब मलिक यांची अंडरवर्ल्ड कनेक्शन प्रकरणात चौकशी सुरु असल्याची माहिती सूत्रांनी दिली आहे. काही दिवसांपूर्वी याप्रकरणात एनआयए आणि ईडीकडून मुंबईत संयुक्तपणे छापे टाकण्यात आले होते. कुख्यात गुंड दाऊदची दिवंगत बहीण हसीना पारकर हिच्याशी संबंधित मालमत्तांवरही छापे टाकण्यात आले होते. तसेच दाऊदचा भाऊ इकबाल कासकर यालाही ईडीने अटक केली होती. इकबाल कासकरच्या चौकशीत नवाब मलिक यांचे नाव पुढे आल्याचे समजते. त्यामुळे ईडीकडून नवाब मलिक यांची चौकशी होती असल्याचे समजते.
काही महिन्यांपूर्वी विरोधी पक्षनेते देवेंद्र फडणवीस यांनी कागदपत्रे समोर आणत नवाब मलिक यांनी अंडरवर्ल्डशी संबंधित व्यक्तींसोबत व्यवहार केल्याचा आरोप केला होता. आता त्या आरोपांबाबतच्या चौकशीसाठीच ही कारवाई झाल्याचे बोलले जात आहे. दरम्यान, ही कारवाई सुडबुद्धीने करण्यात आल्याचा आरोप विरोधकांकडून होत आहे.