मुंबई : मुंबईतील वाहतुकीची कोंडी सोडवून रस्ते सुरक्षेला प्राधान्य देण्यासाठी जगविख्यात उद्योगपती मायकल ब्लुमबर्ग यांच्या ब्लुमबर्ग फिलॉन्थ्रॉफिस्ट फाउंडेशनने मदतीचा हात पुढे केला आहे. ब्लुमबर्ग आणि मुख्यमंत्री देवेंद्र फडणवीस यांच्यात आज यासंबंधीचा पाच वर्षांचा सामंजस्य करार झाला. या करारांतर्गत ब्लुमबर्ग हे मुंबईला १०० कोटी रुपयांची मदत देणार आहेत. जगात प्रत्येक मिनिटाला दोन व्यक्ती रस्त्यावरील अपघातात मरण पावतात. दरवर्षी १.२५ कोटी लोकांचा बळी जातो. अशावेळी रस्ते सुरक्षेवर आपण भर दिला असल्याची भावना मायकल ब्लूमबर्ग यांनी या वेळी व्यक्त केली. ब्लूमबर्ग फाउंडेशनच्या सहकार्याने मुंबईची रस्ते सुरक्षा अव्वल दर्जाची होईल, असा विश्वास मुख्यमंत्री फडणवीस यांनी व्यक्त केला. या कराराच्या वेळी परिवहन मंत्री दिवाकर रावते, मुख्य सचिव स्वाधीन क्षत्रिय, खा. पूनम महाजन, फाउंडेशनचे संचालक डॉ. केली हेन्निंग, महापालिका आयुक्त सीताराम कुंटे, पोलीस आयुक्त राकेश मारिया आणि वरिष्ठ अधिकारी उपस्थित होते. अतिरिक्त आयुक्त एस.व्ही.आर. श्रीनिवास यांनी मुंबईच्या पुढील पाच वर्षांच्या वाहतूक सुरक्षेचे सादरीकरण केले. (विशेष प्रतिनिधी)जगातील २० शहरांकडून रस्ते सुरक्षा नियोजनाचे प्रस्ताव फाउंडेशनने मागविले होते. त्यापैकी १० प्रमुख शहरांची निवड करण्यात आली. त्या अंतर्गत मुंबईची रस्ते सुरक्षा, पायाभूत सुविधा, वाहतुकीचे नियोजन यासाठी मदत आणि जागतिक कीर्तीच्या तज्ज्ञांचे मार्गदर्शन दिले जाणार आहे.
मुंबईच्या रस्त्यांसाठी ‘ब्लूमबर्ग’चे १०० कोटी
By admin | Published: February 18, 2015 1:20 AM